Ditë më parë, moderatori Alaudin Hamiti ndau me ndjekësit e tij një moment të veçantë dhe thellësisht emocional, duke i bërë jehonë historisë së mikut të tij, Danit – një burrë që ka zgjedhur ta thyejë heshtjen mbi një plagë të thellë të luftës në Kosovë.
Dani ndau publikisht rrëfimin e tij tronditës mbi përdhunimin që përjetoi në vitin 1998 nga forcat serbe, gjatë luftës në Kosovë. Një histori që nuk është vetëm personale, por një thirrje për ndërgjegjësim dhe drejtësi për të gjithë burrat që kanë përjetuar dhunë seksuale gjatë luftës dhe që për shumë vite kanë zgjedhur të qëndrojnë në heshtje.
Alaudini, i cili e njohu Danin gjatë eksperiencës në Big Brother, tregoi se aty ka dëgjuar për herë të parë historinë e tij, të cilën e ka përkrahur fort e madje janë bërë edhe miq.
Në një postim në Instagram, moderatori ndau një bisedë private me Danin, ku ky i fundit i dërgoi një fotografi të përbashkët.
Në mesazh, Dani shprehet: “Kurrë nuk do ta humbi këtë fotografi. Respekt të pafundt.”
Në Ditën e të Mbijetuarve të Dhunës Seksuale të Luftës, Dani pati mesazh për secilin prej nesh:
“Turpi nuk është i yni. Turpi është i atyre.”
Dhe për të gjithë të mbijetuarit që ende heshtin:
“Ju them – mos u dorëzoni. Ka shpresë. Ju nuk jeni vetëm.”
Ai bëri thirrje për përkrahje – nga familja, nga shoqëria. Sepse përkrahja nuk është vetëm një gjest – është çlirim. Është drita që ndihmon të rikthehesh në jetë. /Prive By Liberta Spahiu
