Një dokumentar i ri kriminal në Netflix ka hapur “drejtime të reja” për hetuesit në lidhje me vendndodhjen e Amy Bradley – pothuajse tri dekada pas zhdukjes së saj.
23-vjeçarja ishte në pushime me familjen – nënën, babanë dhe vëllain – kur u zhduk pa lënë gjurmë, vetëm tri ditë pasi kishte nisur udhëtimin me anijen turistike Royal Caribbean, më 24 mars 1998.
Amy, nga Petersburg, Virginia, ishte duke festuar në bordin e anijes Rhapsody of the Seas dhe është parë për herë të fundit duke fjetur në një karrige në ballkonin privat të kabinës së saj, rreth orës 5:30 të mëngjesit.
Rreth gjysmë ore më vonë, teksa anija po përgatitej të ankorohej në Curaçao – një ishull në Karaibe, vetëm 40 milje larg brigjeve të Venezuelës – Amy rezultoi e zhdukur.
Tani, regjisorët Ari Mark dhe Phil Lott, të serialit dokumentar me tri pjesë të titulluar Amy Bradley is Missing, kanë zbuluar se kanë filluar të marrin informacione të reja nga persona që pretendojnë të dinë për vendndodhjen e Amy – për të cilën FBI-ja ka ofruar një shpërblim deri në 25,000 dollarë për çdo informacion që çon në gjetjen e saj.
:max_bytes(150000):strip_icc():focal(749x0:751x2)/amy-bradley-missing-3-062425-8f64c960cd5c49de88b44c114bedb1a4.jpg)
“Kur je në një platformë si Netflix, me ndikimin dhe shtrirjen që ka, padyshim që shumë njerëz duan të ndihmojnë – dhe ne i kemi aktivizuar ata,” thanë ata. “Ky ishte edhe qëllimi, por gjithashtu jemi shumë të kujdesshëm në verifikimin e çdo informacioni dhe në përfshirjen e organeve të rendit. Është një proces, por shpresojmë që ndonjë gjë të dalë në dritë.”
Megjithatë, dokumentari thekson se sa e vështirë ka qenë për familjen Bradley të gjejë përgjigje – veçanërisht kur shumë dëshmitarë kanë vendosur të flasin për atë që dinin vetëm pas shumë vitesh.
Kur u pyet pse njerëzit po flasin vetëm tani, Lott u përgjigj: “Secili ka arsyet e veta dhe ne jemi shumë mirëkuptues për këtë. Në dokumentar intervistojmë persona që, për arsye pune apo pasigurie, nuk kanë folur më herët. Askush nuk shkon me pushime duke menduar se do të bëhet pjesë e një misteri të madh.”
“Ajo që i bashkon të gjithë është se vetëm më vonë lidhen pikat. Vetëm kur kanë parë ndonjë artikull në gazetë apo një segment në televizion për Amy, kanë kuptuar se ajo që kishin parë nuk ishte thjesht pjesë e pushimeve – por ndoshta një indicie e rëndësishme.”
Amy Bradley is Missing është tashmë i disponueshëm për t’u parë në Netflix.
/Prive By Liberta Spahiu.
