Romanca e nisur nën vëzhgimin e kamerave të Big Brother VIP Kosova 3 po vazhdon të forcohet edhe mijëra kilometra larg Prishtinës. Ana Ejupi dhe Kevin Edmond kanë lënë pas angazhimet e përditshme për të udhëtuar drejt Kilit, vendlindjes së babait të Kevinit, në një vizitë që duket se zyrtarizon gjërat në një nivel tjetër familjar.
Edhe pse lidhja e tyre brenda shtëpisë pati ulje-ngritjet e saj, dyshja po tregon se distanca dhe sfidat e jashtme nuk janë pengesë. Udhëtimi në Amerikën e Jugut nuk ka qenë vetëm turistik; Kevini ka prezantuar partneren e tij me rrethin e ngushtë familjar, përfshirë personin e dashur për të, gjyshen.
Në një video të siguruar nga momentet e tyre atje, shihet qartë kimia mes Anës dhe familjarëve të Kevinit. Pritja ka qenë më se e ngrohtë, me gjyshen kiliane që nuk i ka kursyer elozhet për ish-banoren e BBVK. “Muy linda, preciosa” (shumë e bukur, e çmuar), dëgjohet të thotë ajo, duke dhënë kështu “vulën” e aprovimit për nusen e re të familjes.
Kjo vizitë konfirmon se Kevin Edmond, i cili ka folur shpesh me emocion për rrënjët e tij latine gjatë qëndrimit në format, ka dashur ta bëjë Anën pjesë të kësaj trashëgimie kulturore dhe familjare. Duket se çifti po shijon çdo moment të kësaj aventure, larg zhurmës mediatike të Kosovës, por gjithsesi nën vëmendjen e fansave që i ndjekin hap pas hapi.
/ Prive By Liberta Spahiu
