Ardian Bujupi sapo na dha lajmin më të ëmbël të vitit!
Këngëtari i njohur, i cili prej vitesh ka zgjedhur të mbajë një profil tejet të ulët sa i përket jetës private, sapo ka thyer heshtjen për të ndarë gëzimin më të madh të jetës së tij. Përmes një postimi në Instagram që rrezaton lumturi, Ardiani ka konfirmuar se ai dhe bashkëshortja e tij, Fjolla Fetinci, janë në pritje të fëmijës së tyre të parë. Çifti shfaqet i ulur në një divan, ndërsa në murin pas tyre është projektuar ekoja e bebit, një detaj ky që e bën foton edhe më artistike dhe prekëse.
“Nga dashuria jonë po lind një jetë e re. Mirë se vjen, engjëlli ynë,” ka shkruar këngëtari në diçiturë, duke emocionuar mijëra ndjekës. Ky moment vjen si një qershi mbi tortë për dyshen, të cilët kurorëzuan dashurinë e tyre në një ceremoni tepër sekrete në verën e vitit 2023 në Gjermani, larg syve të mediave dhe publikut. Që nga ajo kohë, Ardiani është treguar fanatik i privatësisë, duke e mbajtur Fjollën dhe detajet e martesës së tyre larg vëmendjes së panevojshme mediatike, një lëvizje e rrallë kjo për standardet e showbizit shqiptar.
Reagimet nga kolegët dhe miqtë nuk kanë vonuar. Rina Balaj, e cila duket tejet e entuziazmuar, ka komentuar menjëherë, ndërsa Bardhi ka uruar çiftin me “Mashalla”. Edhe Nino Gashi nuk e ka fshehur gëzimin duke shkruar se mezi pret të bëhet xhaxha. Duket se Ardiani po hyn në një kapitull të ri të jetës, ndoshta më të rëndësishmin deri më tani, dhe ne mezi presim të shohim nëse ky ndryshim do të reflektohet edhe në muzikën e tij të ardhshme. Urime çiftit / Prive By Liberta Spahiu
