Pas numërimit të mbi gjysmës së votave për kuvendet komunale, aktori i njohur Arjanit Hoti është tashmë në vijën fituese për t’u bërë asambleist në Komunën e Drenasit, nga lista “Për Drenasin Kampion me Ramiz Lladrovcin”.
Ai renditet i dhjeti në listë dhe, sipas ndarjes aktuale të mandateve dhe kuotës gjinore, pritet të sigurojë ulësen në Asamble nëse renditja e votave mbetet e pandryshuar.
Dy ditë më parë, Hoti kishte reaguar në rrjete sociale me një postim plot emocione, ku theksonte se për të më e rëndësishme se rezultati personal ishte fitorja e Drenasit. “Jam krenar që qëndrova krah kryetarit Ramiz Lladrovci, sepse kjo fitore është fitore e Drenasit, e punës, e dinjitetit dhe e qytetarëve që besuan në të drejtën. Për rezultatin tim personal ende nuk dihet asgjë, por sinqerisht kjo ka pak rëndësi. Unë ndjehem fitues, sepse Drenasi fitoi,” kishte shkruar ai.
Me këtë rezultat, aktori që është bërë i dashur për publikun përmes roleve të tij në teatër dhe seriale, po hyn për herë të parë në politikën lokale, duke u përgatitur për një mandat që, siç ka theksuar vetë, do ta shërbejë me përkushtim ndaj qytetarëve të vendlindjes së tij.
Mbetet të shihet përfundimi i numërimit deri në fund, mirëpo pritet që dikush nga lista të kalojë në ekzekutiv, duke e bërë thuajse fakt të kryer mandatin e Hotit, i cili aktualisht është i 10-ti më i votuari në listë./Prive By Liberta Spahiu
