Ajo që deri dje dukej si një krisje e heshtur mes mureve të vilave luksoze, tashmë është kthyer në një luftë të hapur publike që ka tronditur ndjekësit në mbarë botën.
Përmes një reagimi që erdhi mbrëmë dhe bëri xhiron e mediave brenda pak minutash, djali i madh i çiftit ikonik, Brooklyn Peltz Beckham, ka zgjedhur rrjetin e tij social Instagram për të hedhur akuza të rënda dhe të papritura ndaj prindërve të tij, David dhe Victoria Beckham.
Ai ka deklaruar prerë se nuk ka më asnjë interes për t’u pajtuar me ta, duke thyer kështu heshtjen e gjatë që kishte mbuluar marrëdhënien e tyre.
Në këtë reagim të papritur që pushtoi platformat sociale gjatë natës, Brooklyn ka sqaruar se vendimi i tij për t’u distancuar nuk ka të bëjë me ndikimin e bashkëshortes së tij, Nicola Peltz, siç është përfolur shpesh në mediat rozë.
Ai ka theksuar se për herë të parë në jetën e tij po ngre zërin kundër një kontrolli mbytës që prindërit e tij kanë ushtruar mbi të që nga fëmijëria.
Sipas tij, David dhe Victoria kanë qenë vazhdimisht më shumë të shqetësuar për ruajtjen e imazhit të “Brand Beckham” sesa për lumturinë e tij personale apo stabilitetin e tij emocional.
Një nga pjesët më tronditëse të rrëfimit të tij, i cili u shpërnda me shpejtësi në çdo portal botëror, ishte zbulimi i prapaskenave të dasmës dhe marrëdhënies me të ëmën.
Brooklyn hodhi dritë mbi tensionet e vjetra, duke pretenduar se Victoria është përpjekur sistematikisht të sabotojë bashkëshorten e tij dhe se situata ka arritur deri në atë pikë sa komunikimi i mëtejshëm është bërë i pamundur.
Ai akuzoi prindërit se po përdorin mediat për të krijuar një narrativë të rreme sikur ai është “viktima” e martesës, ndërkohë që sipas tij, e vërteta është se ai është ndjerë i poshtëruar nga veprimet e tyre publike.
Brooklyn e mbylli reagimin e tij të mbrëmshëm me një deklaratë të prerë, duke thënë se që kur ka ndërprerë kontaktet me familjen, gjendja e tij emocionale dhe ankthi janë përmirësuar ndjeshëm.
Ai bëri të ditur se tashmë kërkon vetëm qetësi dhe se çdo komunikim i radhës do të trajtohet në rrugë ligjore, duke u kërkuar prindërve që të mos e përdorin më emrin e tij për të rritur audiencën e tyre apo për të shitur dokumentarë.
Kjo deklaratë ka lënë fansat të ndarë në dy kampe, ndërsa sytë e të gjithëve janë kthyer nga David dhe Victoria, të cilët deri më tani kanë zgjedhur të heshtin përballë këtij sulmi të drejtpërdrejtë nga djali i tyre i parë. /Prive By Liberta Spahiu
View this post on Instagram
