Gazetari i njohur Milaim Zeka ka vendosur të sjellë diçka krejtësisht ndryshe duke filluar nga e hëna në RTV Dukagjini.
Emisioni i tij i ri “Burra dhe Gra”, që starton nesër në orën 20:00, nuk thyen vetëm barrierën gjinore duke ulur burra dhe gra në një tavolinë, por bën bashkë figura të njohura nga të gjitha trojet shqiptare. Ky format premton të jetë një pasqyrë reale e mentalitetit mbarëkombëtar, duke shkrirë kufijtë mes Kosovës, Shqipërisë dhe Maqedonisë së Veriut në një debat të vetëm të përditshëm.
Përveç Milaimit, influencerit Ylli Dreshaj e Mirlinda Dreshajt, që përfaqësojnë dinamikën nga Kosova, paneli fiton një peshë të veçantë me përfshirjen e aktores së dashur nga Shqipëria, Arjola Demiri, dhe këngëtares së njohur nga Maqedonia e Veriut, Jehona Shaqiri.
Kjo përzierje gjeografike dhe profesionale, ku bëhen bashkë arti, muzika dhe gazetaria, garanton që temat sociale të mos trajtohen vetëm bardh e zi. Prezenca e Jehonës sjell një frymë të re nga Shkupi, ndërsa temperamenti i Arjolës dhe Yllit premton debate të zjarrta.
Me këtë përbërje që mbulon çdo kënd të shqiptarisë, duket se mbrëmjet televizive do të kenë më në fund ekuilibrin dhe përfaqësimin që audienca e gjerë ka kërkuar prej kohësh. /Prive By Liberta Spahiu
