Pas hetimeve intensive lidhur me rrahjen e gazetarit Burim Pacolli, reperi Mossi dhe dy persona të tjerë po mbahen në ndalim nga Policia e Kosovës që prej ditës së mërkurë.
Zëdhënësja e Prokurorisë Themelore në Prishtinë, Kaltrina Shala, ka bërë të ditur se mbi reperin rëndojnë dyshime për tri vepra të ndryshme penale: “Lëndim i lehtë trupor”, “Kanosje” dhe “Posedim i paautorizuar i narkotikëve”.
Për shkak të këtyre akuzave të rënda, Prokuroria ka kërkuar caktimin e masës së paraburgimit prej 30 ditësh për Mossin dhe dy të dyshuarit e tjerë. Ky hap është konfirmuar zyrtarisht për “Betimi për Drejtësi” nga prokurori i rastit, Burim Neziri, i cili u shpreh se kërkesa është dorëzuar ditën e sotme.
“Po, sot kemi kërkuar caktimin e masës se paraburgimit”, tha ai.
Ndërkohë, zëdhënësja e Gjykatës Themelore në Prishtinë, Mirlinda Gashi, ka theksuar se kërkesa e prokurorisë sapo është pranuar. Megjithatë, mbetet ende për t’u caktuar data dhe ora e seancës dëgjimore, ku do të vendoset përfundimisht fati i reperit dhe të dyshuarve të tjerë. Prokuroria po vazhdon me të gjitha veprimet hetimore lidhur me këtë çështje. /Prive By Liberta Spahiu
