Pas konfirmimit të ëmbël pak javë më parë se do të bëhen prindër për herë të parë, çifti i njohur i këngëtarëve, Drilon Jahdauti dhe Beslira Xhafaj, kanë shuar kureshtjen e mijëra ndjekësve duke zbuluar gjininë e fëmijës që po presin. Dyshja, të cilët janë kthyer në një nga çiftet më të komentuara të momentit në showbizz-in shqiptar, vendosën të shmangin festat klishe me tullumbace për të sjellë diçka më artistike dhe unike.
Në një video të publikuar mbrëmjen e sotme në Instagram, Driloni dhe Beslira shfaqen plot stil dhe emocione përballë një figure të bardhë në formë arushi. Pa shumë fjalë, por me buzëqeshje që tregonin gjithçka, ata derdhën njëkohësisht bojën mbi figurinë, e cila mori menjëherë ngjyrën blu. Kjo konfirmoi zyrtarisht se familjes së tyre të re do t’i shtohet një djalë!
Reagimet në rrjet kanë qenë të menjëhershme, ku miq, kolegë dhe fansa kanë vërshuar me urime për trashëgimtarin. Ky moment shënon një kapitull të ri për dyshen, të cilët pas suksesit në muzikë dhe famës në rrjetet sociale, tani po përgatiten për rolin më të rëndësishëm të jetës së tyre. Mbetet për t’u parë nëse ata do të zbulojnë edhe emrin e vogëlushit po kaq kreativisht në ditët në vijim. /Prive By Liberta Spahiu
