Ish-modelja e njohur shqiptare, Drenusha Latifi, i ka marrë ndjekësit e saj në një udhëtim të këndshëm në kohë, duke hapur “arkivat” e saj personale. Përmes disa postimeve në llogarinë e saj në Instagram (Instastory), ajo ka ndarë imazhe të rralla nga vitet 2002 dhe 2003, një periudhë kur ajo po shkëlqente në skenat e modelingut dhe spektakleve të bukurisë.
Në fotografitë e publikuara, Drenusha risjell në vëmendje fillimet e karrierës së saj të suksesshme. Një nga imazhet e shfaq atë tejet elegante me një fustan me vija, shoqëruar me mbishkrimin “Miss Kosova 2002”.
Ndërsa një tjetër portret i mrekullueshëm, i cili thekson tiparet e saj, mban shënimin se i përket një sesioni fotografik të vitit 2003, duke dëshmuar sharmin e saj natyral që në hapat e parë të karrierës.
Një vëmendje të veçantë në këto postime marrin kujtimet nga përfaqësimi i saj në arenën ndërkombëtare. Drenusha ka ndarë foto nga pjesëmarrja në “Miss Tourism International” në vitin 2002. Në njërin prej imazheve, ajo shfaqet duke pozuar krenare me shiritin e “Kosovës” në sfondin e kullave ikonike “Petronas Twin Towers” në Kuala Lumpur, Malajzi.
Për të treguar edhe detajet e kurimit të atyre viteve, ajo ka publikuar një portret të afërt me grim të theksuar ku shkruan me humor: “Thjerrëzat në pikë”. Këto imazhe jo vetëm që rikthejnë nostalgjinë e atyre viteve për publikun, por edhe rikonfirmojnë Drenusha Latifin si një nga vajzat më të bukura që ka përfaqësuar Kosovën në botë. /Prive By Liberta Spahiu
