Një prej çifteve më të dashura të ekranit turk ka marrë sot një vendim që ka tronditur publikun: pas nëntë vitesh martese, aktorët Pelin Akil dhe Anıl Altan janë divorcuar zyrtarisht. Historia e tyre e dashurisë nisi në xhirimet e serialit “Arka Sıradakiler”, ku ata u njohën dhe shumë shpejt kaluan nga roli në realitet duke u bërë një çift i admiruar nga fansat.
Martesa e tyre u kurorëzua në vitin 2016 dhe tre vite më pas ata u bënë prindër të binjakëve Alin dhe Lina, të cilët shpesh kanë qenë në qendër të vëmendjes së ndjekësve përmes postimeve të ngrohta që çifti ndante në rrjete sociale.
Për vite me radhë ata u cilësuan si “çift model”, duke u parë kudo bashkë, në premiera filmash, evente televizive dhe në çdo dalje publike. Por pas muajsh me thashetheme të shumta për një krizë në marrëdhënie, sot lajmi është bërë fakt: divorci i tyre është zyrtarizuar nga gjykata, siç raportojnë mediat më të mëdha turke.
Vetë Pelin kishte pranuar së fundmi se rrugët e tyre si bashkëshortë ishin ndarë, duke sqaruar se përtej kësaj ata mbeten të lidhur gjithmonë për shkak të fëmijëve.
Ajo deklaroi: “Si burrë e grua i kemi ndarë rrugët, por kemi fëmijët dhe për këtë arsye gjithmonë do të jemi bashkë.” Ky mesazh u prit me reagime të shumta, nga ata që u shprehën të tronditur deri tek ata që përgëzuan çiftin për mënyrën e matur dhe të respektueshme se si po e menaxhojnë këtë periudhë të vështirë.
Nga ana tjetër, mediat theksojnë se Pelin ka zgjedhur ta kalojë verën e fundit duke u marrë me projekte të reja dhe duke shijuar pushime me fëmijët, ndërsa Anıl është parë gjithnjë e më rrallë në publik, duke rritur kureshtjen e fansave.
Sot gjithçka është vulosur në mënyrë ligjore, duke mbyllur një kapitull të gjatë dashurie që për shumëkënd dukej i pathyeshëm. Një fund që nuk erdhi me bujë skandalesh apo akuza, por me qetësi dhe me respekt, duke mbetur shembull se si edhe ndarjet më të bujshme mund të ndodhin me dinjitet. /Prive By Liberta Spahiu
