Situata e Karim Adeyemi te Borussia Dortmund po shkon drejt një epilogu të pashmangshëm.
Mediat gjermane raportojnë se klubi i Bundesligës ka vendosur të mos i vendosë më pengesa sulmuesit, duke e nxjerrë zyrtarisht në shitje kartonin e tij për merkaton e janarit. Ky vendim vjen pas një periudhe tensionesh, ku lojtari ka bërë të qartë dëshirën e tij për të nisur një aventurë të re jashtë Gjermanisë.
Sipas burimeve pranë klubit, pakënaqësia e Adeyemit lidhet ngushtë me jetën e tij personale. Mësohet se sulmuesi kërkon transferimin në një metropol më të madh evropian, një dëshirë kjo e ndikuar fuqishëm nga partnerja e tij, këngëtarja e njohur Loredana. Kjo e fundit ka kërkuar një ndryshim ambienti, duke bërë që futbollisti të vërë në lëvizje agjentët e tij për të gjetur një destinacion të ri që plotëson kërkesat e tyre si çift.
Ndonëse fillimisht Dortmundi tentoi ta mbante me çdo kusht, sjelljet e fundit të lojtarit në fushë kanë detyruar drejtuesit të ndryshojnë qëndrim. Një përplasje me kundërshtarët dhe largimi i tij i menjëhershëm nga pankina pas zëvendësimit, u panë si një shenjë e qartë rebelimi ndaj stafit teknik. Pas këtyre episodeve, klubi ka “ngritur flamurin e bardhë” dhe është gati të dëgjojë ofertat që do të vijnë në drejtim të tij.
Për shërbimet e sulmuesit gjerman nuk mungon interesi nga gjigantët e Europës. Manchester United dhe Barcelona janë dy emrat kryesorë që po monitorojnë situatën me vëmendje. Megjithatë, pengesa kryesore mbetet çmimi i lartë prej 60 milionë eurosh që Dortmundi ka vendosur për kartonin e tij. Kjo shifër mund të jetë problematike sidomos për Barcelonën, për shkak të kufizimeve të tyre financiare, por dëshira e lojtarit për largim pritet të jetë faktori vendimtar në negociata. /Prive By Liberta Spahiu
