Regjisorja e dokumentarit “Unknown Number: The High School Catfish” ka ndarë mendimin e saj në lidhje me nënën që ngacmoi në mënyrë kibernetike vajzën e saj.
Ky dokumentar u publikua në Netflix më 29 gusht dhe ka tërhequr vëmendjen në mbarë botën, duke arritur 13,600,000 shikime në platformë, sipas FlixPatrol.
Programi trajton historinë e Lauryn Licari dhe ish-të dashurit të saj, të cilët u ngacmuan online për 12 muaj nga një numër i panjohur.
Pasi autoritetet u përfshinë në rast, zbuluan se personi që i kishte dërguar mesazhet fyese Lauryn-it ishte vetë nëna e saj.
FBI gjurmoi adresat IP të mesazheve, të cilat çuan te nëna e saj, Kendra Licari, edhe pse ajo kishte përdorur VPN (rrjete virtuale private) për të fshehur vendndodhjen.
Në fund, Kendra u arrestua dhe u akuzua për disa vepra penale, përfshirë përndjekje dhe përdorim të kompjuterit për të kryer krime.
Tani, regjisorja e dokumentarit, Skye Borgman, ka ndarë mendimet e saj për Kendrën dhe nëse ajo që tha gjatë dokumentarit ishte apo jo e sinqertë.
Kendra u intervistua për pesë orë si pjesë e dokumentarit.
Borgman i tha revistës PEOPLE:
“Më dukej e rëndësishme të tregohej edhe perspektiva e Kendrës, por më e rëndësishme ishte të dëgjonim perspektivën e fëmijëve. Të dëgjoja nga ajo dhe të kuptoja përgjigjet e saj ishte diçka që mendoj se i shërbeu mirë dokumentarit.”
Sa i përket vërtetësisë së fjalëve të Kendrës, ajo shton:
“Të vendosësh nëse ajo që tha është e vërtetë apo jo, nuk mund ta gjykoj 100%.”
Sipas regjisores, gjatë intervistës që zgjati me orë të tëra, Kendra përsëriste shpesh veten, dhe jo çdo gjë që ajo tha u përfshi në versionin përfundimtar të dokumentarit.
“Përgjigjet më të qarta që dha ishin ato që përfundimisht u përfshinë në dokumentar,” shpjegon Borgman.
Në fund, Borgman beson se Kendra në të vërtetë nuk e di pse e bëri atë që bëri.
Në një intervistë në podcastin “You Can’t Make This Up”, sipas TUDUM, Borgman shprehet:
“Nuk jam e sigurt që ajo e di me të vërtetë pse e bëri.”
Ajo shton:
“[Kendra] përmend në dokumentar një sulm që i kishte ndodhur asaj kur ishte afërsisht në moshën e Lauryn-it. Flet për sa e frikshme ishte për të ta shihte vajzën e saj të vetme duke u rritur, dhe se kjo është ajo me të cilën ajo lidhet emocionalisht dhe që beson se e shtyu të dërgonte këto mesazhe dhe të përpiqej ta mbante Lauryn-in pranë vetes.”
“Unknown Number: The High School Catfish” është aktualisht i disponueshëm për shikim në Netflix. /Prive By Liberta Spahiu
