Shtëpia e “Big Brother VIP Albania” vazhdon të jetë një terren i vështirë për ndjenjat, dhe këtë po e provojnë në lëkurën e tyre Brikena dhe Mateo. Ditët e fundit kanë sjellë një ftohje të dukshme në marrëdhënien e dyshes, e cila është shoqëruar me debate dhe paqartësi të shumta që nuk kanë shpëtuar pa u vënë re nga publiku jashtë. Presioni i lojës brenda mureve duket se po bën të veten, duke e vendosur çiftin në një provë mjaft të ndjeshme.
Në këtë situatë aspak të lehtë, mbështetja nga jashtë merr një vlerë të madhe. Kader Kicaj ka vendosur të reagojë publikisht përmes rrjeteve sociale, duke dalë në mbrojtje të çiftit dhe duke i dhënë zemër veçanërisht Brikenës. Ajo ka ndarë një fotografi të dyshes, duke i përshkruar si “dy të rinj mes presionit e thikave prapa shpine”, një frazë që tregon qartë se si i sheh ajo dinamikat dhe intrigat aktuale në shtëpi.
Pavarësisht situatave të ngarkuara, Kader shprehet optimiste se e vërteta do të dalë në dritë. Ajo theksoi se megjithatë, sado e zhurmshme të bëhet shtëpia, në fund të ditës “ajo që mbetet është e vërteta”.
Për të, ndjenjat janë më të forta se çdo strategji loje, duke i inkurajuar ata me fjalët se “dashuria dhe sinqeriteti gjithmonë gjejnë rrugën e tyre për të triumfuar, pavarësisht gjithçkaje që gatuhet rreth e rrotull”. Në mbyllje të postimit të saj, ajo i drejtohet me plot mbështetje banores nga Kosova duke i kërkuar të mos dorëzohet: “Briki, forca drejt finales dhe fitores”. /Prive By Liberta Spahiu
