Pas muajsh të gjatë vuajtjesh dhe trajtimesh të rënda, influencerja e njohur Blerta po kalon një tjetër periudhë të vështirë shëndetësore.
Në një postim në rrjete sociale, partneri i saj Blero ka bërë të ditur se Blerta, e cila vuan nga Craniocervical Instability (paqëndrueshmëri kranio-cervikale), është përballur sërish me komplikacione pas një periudhe të shkurtër përmirësimi.
“Ne ishim përkohësisht në shtëpi, arritëm të merrnim frymë pak më lirshëm dhe Blerta dukej mirë, aq sa mezi e besonim. Por papritur gjithçka ndryshoi – ajo pati temperaturë të lartë deri në 39.3 dhe rrahje të forta zemre, aq sa duhej të ktheheshim menjëherë në spital”, ka shkruar ai.
Sipas Bleros, mjekët kanë konstatuar një infeksion të rrezikshëm, me shumë gjasë të shkaktuar nga linja e ushqimit intravenoz (PICC line) që përdoret për ta ushqyer Blertën. “Fatkeqësisht kjo gjendje është potencialisht e rrezikshme për jetën. Ishte si një goditje për ne, sepse pas gjithë procedurave dhe përpjekjeve, ajo sërish po përballet me komplikime të rënda. Ajo është me të vërtetë shumë keq,” ka treguar ai.
Blero thekson se pavarësisht dhimbjeve të forta dhe sfidave të shumta, Blerta vazhdon të luftojë me forcë dhe durim. Ai ka falënderuar të gjithë ndjekësit dhe miqtë që i kanë qëndruar pranë me lutje e mbështetje morale:
“Ju falënderojmë nga zemra të gjithëve për dashurinë dhe lutjet tuaja. Ju na jepni forcë. Lutuni për Blertën.”
Craniocervical Instability është një sëmundje e rrallë që prek lidhjen mes kafkës dhe shtyllës kurrizore, duke shkaktuar dhimbje ekstreme, marramendje, dobësi muskulare dhe probleme neurologjike.
Ndërsa betejën e saj Blerta e ndan shpesh me ndjekësit, ajo është bërë simbol i forcës dhe i shpresës për shumë njerëz që përballen me sëmundje të rënda kronike. /Prive By Liberta Spahiu
