Gjashtë përpjekje pa sukses, dhe e vërteta e fshehur e dy viteve të fundit të Armondës sapo ka dalë në dritë.
Të gjithë i njohim Armondën dhe Flamurin si çiftin që na ka falur shumë momente të bukura në rrjete sociale. Por a ju kujtohet ai largimi i tyre i papritur pak kohë më parë, kur folën hapur për ankthin dhe netët pa gjumë? Mesa duket, ajo paska qenë vetëm një pjesë e vogël e një beteje jetësore që po e mbanin larg syrit të publikut.
Kur u rikthyen, ndjekësit menduan se situata ishte qetësuar. Megjithatë, një postim i fundit nga Armonda ka treguar anën e panjohur të atyre muajve. Ajo ka vendosur të flasë hapur, duke zbuluar përfundimisht se për çfarë ishin ato gjashtë përpjekje.
Pa asnjë bark të rrumbullakosur apo fotografi për të ndarë me ndjekësit, ajo rrëfeu se si kaluan nga shpresa e madhe, te lamtumira e heshtur.
Brenda vetëm dy viteve, Armonda ka pasur plot gjashtë përpjekje për t’u bërë nënë. Gjashtë herë ku shpresoi me fjalët “ndoshta këtë herë”, dhe gjashtë herë ku i është dashur të përballet me zhgënjimin. Duke u mbështetur në fjalët e saj, ajo buzëqesh nga jashtë, por përbrenda siç shprehet vetë, mban zi një nënë që nuk e sheh askush.
Megjithëse po lufton prej dy vitesh, ajo tregon se gjen forcën për t’u zgjuar çdo ditë jo sepse është e fortë, por sepse zemra e saj nuk mund të ndalojë së besuari.
Ky rrëfim i sinqertë nga Armonda është një dëshmi se të jesh nënë nuk matet gjithmonë vetëm me zërat e fëmijëve nëpër shtëpi, por edhe me shpresën e pamasë dhe dashurinë që një grua ruan në shpirt pavarësisht vështirësive. /Prive By Liberta Spahiu
