Një grua që po merrte pjesë në një garë mbijetese në natyrë, organizuar në YouTube, u shpëtua pasi humbi në një pyll në Michigan për plot 18 orë.
Rreth orës 17:00 me kohën lokale, ditën e premte më 5 shtator, 36-vjeçarja me origjinë nga Kalifornia u largua nga kampi bazë i caktuar në Pyllin Pigeon River, në Charlton Township, për të kërkuar ujë, njoftoi Zyra e Sherifit të Qarkut Otsego në një deklaratë të publikuar në Facebook.
Pasi gruaja nuk u kthye, organizatorët e garës nisën kërkimin për të, por përpjekjet e tyre rezultuan të pasuksesshme.
Gruaja u raportua e zhdukur te autoritetet rreth orës 05:00 të mëngjesit të nesërmen.
“U ndërmor një operacion kërkimi dhe njësitë e qenve të policisë shtetërore të Michigan hynë në pyllin e dendur, i cili ishte ende i dëmtuar nga stuhia e akullit,” thuhet në një deklaratë të Policisë Shtetërore të Michigan (MSP), e ndarë në platformën X.
Rreth orës 10:40 të mëngjesit, një helikopter policie e lokalizoi gruan e zhdukur “thellë brenda një zone kënetore”, sipas Zyrës së Sherifit të Otsego County. Ajo kishte qëndruar në të ftohtë dhe në shi për pothuajse 18 orë.
Në operacionin e kërkimit morën pjesë disa autoritete, përfshirë disa departamente zjarrfikëse, Departamentin e Burimeve Natyrore të Michigan dhe njësinë ajrore të Policisë Shtetërore.
Pasi gruaja — identiteti i së cilës nuk është bërë publik — u gjet nga ekuipazhi i helikopterit, oficerët në tokë dhe njësitë e qenve iu afruan asaj.
“Gruaja arriti të ecë vetë jashtë zonës dhe u vlerësua nga stafi i urgjencës në vendngjarje,” thuhet në deklaratën e sherifit.
“Ajo u lirua pa ndonjë lëndim serioz.”
Pamjet e shpëtimit të ndara nga Policia Shtetërore e Michigan tregojnë gruan duke u përpjekur të tërheqë vëmendjen e helikopterit ndërsa qëndronte e humbur mes pemëve.
Një anëtar i ekuipazhit të helikopterit dëgjohet teksa udhëzon forcat e rendit dhe zjarrfikësit në tokë drejt vendndodhjes së saj. Ata arritën ta nxjerrin nga pylli në mënyrë të sigurt, sipas deklaratës së policisë.
“Faleminderit të gjithë Shpëtimtarëve të Parë: MSP (Policia Shtetërore e Michigan), MSP Helo (helikopteri), OCSD (Zyra e Sherifit të Qarkut Otsego), DNR (Burimet Natyrore), Zjarrfikësit e Charlton Twp, Zjarrfikësit e Otsego Lake, Zjarrfikësit e Star Township, dhe OCEMS – Shërbimi i Emergjencës,” – shkroi Menaxhimi i Emergjencave të Qarkut Otsego në Facebook, duke ndarë edhe dy fotografi nga vendngjarja. /Prive By Liberta Spahiu
