Ish-shefja e Grupit Parlamentar të Lëvizjes Vetëvendosje dhe ish-deputetja, Mimoza Kusari-Lila, ka njoftuar pasditen e sotme për ndarjen nga jeta të babait të saj, Adem Kusari.
Lajmin e hidhur e ka bërë të ditur vetë ish-deputetja përmes një postimi në rrjetet sociale, ku ka shprehur dhimbjen për humbjen e njeriut të dashur pas një sëmundjeje të shkurtër.
“Me pikëllim të thellë ju njoftojmë se babai, bashkëshorti dhe gjyshi ynë, Adem Kusari, ka ndërruar jetë sot pasdite. Babi u nda nga jeta ashtu siç jetoi: i rrethuar nga familja me dashuri, me dinjitet, me respekt për jetën dhe për njeriun,” shkruan Kusari-Lila.
Mungesa në fushatë dhe trajtimi në Gjakovë
Gjendja e rënduar shëndetësore e babait të saj ishte paralajmëruar pak ditë më parë. Ish-shefja e deputetëve të VV-së kishte njoftuar opinionin dhe mbështetësit se do të mungonte në një pjesë të takimeve të fushatës, për t’i qëndruar pranë familjes në këto momente kritike.
Mësohet se i ndjeri, Adem Kusari, po trajtohej ditët e fundit në Spitalin e Përgjithshëm “Isa Grezda” në Gjakovë.
Familja Kusari ka bërë të ditur se detajet rreth ceremonisë mortore do të njoftohen së shpejti. /Prive By Liberta Spahiu
