Duket se buja me yllin botëror Anitta ishte vetëm maja e ajsbergut.
Së fundmi, rrjeti ka zier nga diskutimet se këngëtarja e famshme braziliane është shfaqur në studio me një version identik të hitit të Taynës, “Si Ai”. Por, gërmimet më të thella tregojnë se kjo “vjedhje” apo frymëzim nuk është një rast i izoluar.
“Si Ai” – Një himn i vërtetë në Brazil
Që prej publikimit, projekti “Si Ai” i Taynës ka kaluar çdo pritshmëri, duke u kthyer në këngën e saj më të dëgjuar ndonjëherë, me mbi 67 milionë dëgjime vetëm në Spotify. Por suksesi më i frikshëm ka ardhur nga Brazili. Kënga është bërë virale në TikTok-un brazilian, duke u kthyer në një trend masiv që duket se ka “hipnotizuar” tregun latin.
Artistët që nuk pritën gjatë
Fakti që Tayna ka goditur në shenjë me këtë beat dhe vijë melodike, vërtetohet nga numri i artistëve brazilianë që kanë nxituar të publikojnë versione që të kujtojnë menjëherë “Si Ai”.
Nga të dhënat e siguruara, spikat kënga “Gemidinha” nga Felipe Amorim. Mjafton të dëgjosh ritmin dhe frazimin për të kuptuar ngjashmërinë e frikshme me hitin e reperes shqiptare.
Kënga ka marrë miliona dëgjime, duke shfrytëzuar pikërisht atë “vibe” që Tayna e bëri virale.
Nuk mbaron me kaq. Një tjetër projekt, “O Prédio Vai Tremer”, i sjellë nga një grup artistësh përfshirë MC Bruninho, Henry Freitas dhe Kadu Martins, duket se ndjek të njëjtën formulë të suksesit.
Edhe këtu, influenca e “Si Ai” është e pamohueshme, duke konfirmuar se tingulli i krijuar nga Tayna është kthyer në një standard të ri për “funk-un” brazilian.
Çfarë ndodh tani? Ndërsa rasti i Anittës bëri bujë për shkak të statusit të saj global, këto projekte të tjera tregojnë se tregu brazilian e ka përqafuar (dhe ndoshta përvetësuar) “Si Ai” prej kohësh.
Mbetet për t’u parë nëse menaxhmenti i Taynës do të ndërmarrë hapa për të kërkuar kreditet e autorësisë, apo nëse ky do të konsiderohet thjesht si një triumf i muzikës shqiptare që thyen kufijtë, qoftë edhe në forma të paautorizuara. /Prive By Liberta Spahiu
