Joz Marku, ish-konkurrenti i Big Brother VIP Albania 4, po vazhdon të qëndrojë në qendër të vëmendjes mediatike edhe pas daljes së tij nga shtëpia më e famshme në Shqipëri. Emri i tij është kthyer në një nga më të përfolurit në rrjetet sociale dhe në shtypin rozë, pas një episodi të tensionuar që ndodhi të shtunën në prime.
Teksa po largohej si i eliminuari i radhës, Joz goditi me shuplakë Gjestin, në një moment që u komentua gjerësisht në rrjet dhe shkaktoi debat të madh në publik. Pamjet nga incidenti bënë xhiron e internetit, ndërsa reagimet ishin të shumta dhe të ndara – disa e dënuan veprimin, të tjerë e justifikuan me “provokimin e vazhdueshëm”.
Menjëherë pas incidentit, ai u shoqërua nga Policia, por u lirua të nesërmen. Në një deklaratë në polici, ai theksoi se “po e provokonte tërë kohën”, duke i dhënë kështu një tjetër dimension ngjarjes që ndodhi para kamerave.
Ndërkohë, sot pasdite, është raportuar se Jozi ka mbyllur profilin e tij në Instagram, një lëvizje që shumëkush po e lidh me presionin publik dhe reagimet pas ngjarjes.
Edhe pse ka zgjedhur të heshtë publikisht, një bisedë private e rrjedhur nga Shkupi, në të cilën Jozi duket se flet me një ton ndryshe nga ai i zakonshmi e me më pak krenari, ka shtuar spekulimet se situata mund ta ketë goditur emocionalisht më shumë sesa po shfaqet në publik.
A do rikthehet Jozi me një sqarim të plotë apo do zgjedhë të qëndrojë në heshtje? Rrjeti mezi po pret zhvillimet e radhës. /Prive By Liberta Spahiu
