Biznesmeni i njohur nga Suhareka, Shaqir Palushi, ka treguar edhe një herë anën e tij humane dhe mbështetjen e pakursyer për njerëzit në nevojë. Ditën e sotme, ai ka publikuar një fotografi krah ish-banorit të BBVA, Stenaldo Mëhillit, për të cilin njoftoi ditë më parë se ka ndarë një shumë të konsiderueshme prej 10 mijë eurosh.
Përmes një postimi në llogarinë e tij në rrjetin social Facebook, Palushi ka treguar se angazhimi i tij për këtë rast nuk ka përfunduar me donacionin e tij personal. Ai i është drejtuar miqve dhe ndjekësve me një thirrje të hapur për mbështetje të mëtejshme, duke theksuar se qëllimi kryesor është që Stenaldos t’i sigurohet një shtëpi.
Për t’i hapur rrugë solidaritetit qytetar, biznesmeni ka bërë publike të gjitha të dhënat e nevojshme bankare. Në postim janë bashkëngjitur llogaritë personale të Stenaldos në Euro dhe Lekë, si dhe llogaria e “Fondacionit Golden Eagle”, për t’ua lehtësuar procedurën të gjithë atyre që dëshirojnë t’i bashkohen kësaj nisme bamirësie.
Ky gjest fisnik pritet të shërbejë si një shembull dhe të mobilizojë qytetarë e biznese të tjera, në mënyrë që ëndrra e Stenaldos për të pasur një strehë të ngrohtë, të kthehet sa më parë në realitet. /Prive By Liberta Spahiu
