Ylli i njohur i muzikës pop Justin Timberlake, ka zbuluar se është diagnostikuar me sëmundjen Lyme.
Lajmin e bëri të ditur përmes një postimi emocional në Instagram, ku kujtoi përfundimin e turneut të tij “Forget Tomorrow” që u mbyll në Turqi ditën e mërkurë.
“Sëmundja Lyme mund të jetë rraskapitëse pa mëshirë, si mendërisht ashtu edhe fizikisht,” shkroi ai.
Këngëtari i hitit “SexyBack” pranoi se, si një person me natyrë të rezervuar, kishte menduar ta ndërpriste turneun pas diagnozës, por vendosi të vazhdonte: “Vendosa që gëzimi që më jep performanca ia vlen shumë më shumë sesa stresi i përkohshëm që ndiente trupi im. Jam shumë i lumtur që vazhdova.”
Sëmundja Lyme transmetohet nga rriqrat Ixodes (të njohura si rriqrat e drerit) dhe mund të shkaktojë simptoma të ngjashme me gripin, probleme neurologjike, dhimbje artikulare dhe të tjera. Në shumicën dërrmuese të rasteve, ajo trajtohet me sukses përmes antibiotikëve.
“Me të vërtetë nuk e di çfarë më pret në skenë në të ardhmen, por gjithmonë do ta çmoj këtë rrugëtim! Dhe të gjitha të mëparshmet! Ka qenë legjendare për mua,” shtoi Timberlake në postimin e tij.
Gjatë turneut, këngëtari anuloi dhe shtyu disa koncerte për shkak të problemeve shëndetësore si bronkiti dhe laringiti. Ai shtyu gjashtë koncerte në SHBA që ishin planifikuar për tetor dhe nëntor, për në muajin shkurt, ndërsa koncerti i fundit i turneut në Ohio u anulua për shkak të gripit.
Fituesi i 10 çmimeve Grammy e mbylli postimin duke falënderuar bashkëshorten e tij, aktoren Jessica Biel, dhe dy djemtë e tyre, Silas dhe Phin: “Asgjë nuk është më e fuqishme sesa dashuria juaj pa kushte. Ju jeni zemra dhe shtëpia ime. Jam rrugës për tek ju.” /Prive By Liberta Spahiu
View this post on Instagram
