Përfundimi i “Big Brother VIP Kosova 4” mund të ketë shpallur Londrim Mekajn si fitues, por dramat dhe kurioziteti i vërtetë sapo kanë filluar jashtë dyerve të shtëpisë.
Të gjithë sytë dhe veshët ishin te Klodian Mihaj dhe raporti i tij shumë i përfolur me të dashurën, Alice, pas një rrugëtimi të gjatë dhe të ngarkuar me dinamika. I ftuar në episodin special “Post Big Brother”, ish-finalisti vendosi të flasë copa-copa, pa zbuluar taman asgjë.
Duke i qëndruar stilit të tij, Klodi tregoi se pas kësaj eksperience marramendëse ka nevojë fillimisht për pak kohë për veten, por theksoi se dyshja tashmë ka biseduar për gjithçka.
Ai mohoi kategorikisht të ketë pasur dyshime në lidhjen e tyre apo të ketë marrë ndonjë “stop” nga Alice, ndonëse e pranoi me sportivitet se disa nga veprimet e tij brenda lojës e kishin bezdisur partneren. Këtu nuk mund të rrinte pa ndërhyrë Hygerta Sako, e cila me doza humori shtoi se Alice ishte “pak si shumë” e bezdisur, një batutë që shkaktoi menjëherë shpërthimin në të qeshura të Londrimit.
Klodi konfirmoi se Alice jo vetëm që e ka pritur në Prishtinë së bashku me familjen e tij, por tashmë është takuar personalisht edhe me miqtë e tij të rinj, Hygertën dhe Londrimin. Për t’i vënë kapakun gjithë aludimeve, Klodi nuk i kurseu detajet pikante kur tregoi për xhirot e tyre të para pas daljes. Duke qeshur, ai përshkroi skenën rrugëve të Prishtinës duke thënë se ndërsa Londrimi i jepte veturës, ai dhe Alice ishin tërësisht të fokusuar te njëri-tjetri “tu u kapë” në sediljen e pasme. /Prive By Liberta Spahiu
