Duket se shikuesit e “Big Brother VIP Kosova” duhet të mësohen me një ndryshim të rëndësishëm në mënyrën e ndjekjes së spektaklit. Pas situatës së krijuar të hënën e kaluar, ku spektakli “Prime” nuk u transmetua në kanalin zyrtar në YouTube, e njëjta gjë do të përsëritet edhe sonte.
Lajmi është konfirmuar pak minuta më parë nga vetë moderatori i programit, Alaudin Hamiti. Përmes një postimi në Instagram, ai ka njoftuar ndjekësit se “Prime sot nuk do të jetë në YouTube”, duke i dhënë fund çdo paqartësie për ata që prisnin transmetimin online.
Kjo lëvizje duket se ka për qëllim orientimin e audiencës drejt platformave televizive partnere. Për të gjithë ata që duan të ndjekin spektaklin sonte, opsionet janë të ndara sipas rajoneve gjeografike:
* Në Kosovë: Spektakli transmetohet përmes platformave Art Motion dhe Kujtesa.
* Në Shqipëri: Shikuesit mund ta ndjekin në DigitAlb dhe Tring.
* Në Evropë: Transmetimi mbulohet nga NimiTV.
* Në Amerikë dhe Kanada: Shikuesit mund të kyçen përmes TV Alb.
Mbetet për t’u parë nëse ky bllokim i YouTube do të jetë i përhershëm për të gjitha netët “Prime” të këtij edicioni, apo nëse është një vendim momental.
Për momentin, e sigurt është që për të parë banorët dhe dinamikat e sotme, YouTube nuk është një opsion.
