Djali i ish-presidentit Hashim Thaçi, Endriti, ka ndarë disa momente personale nga vizitat në Hagë, ku po mbahet babai i tij.
Në një bisedë për “Grida Duma Podcast”, ai tregoi se familja e viziton Thaçin çdo muaj, pasi kanë të lejuara deri në tre vizita mujore.
“Diskutojmë për tema të ndryshme, për aktivitetet e tij ditore, për librat që lexon. Momenti më i vështirë është kur mbaron takimi dhe ne duhet ta lëmë brenda. Dhimbje tepër e madhe”, është shprehur ai.
Më tej, Endriti u shpreh se ndjehet me fat që është djali i Hashim Thaçit.
“Jam me fat dhe shumë i lumtur që jam djali i tij, djali i një çlirimtari që fitoi luftën ndaj Serbisë, i një arkitekti që bashkë me shokët e tij bëri pavarësinë e Kosovës. Është përgjegjësi e madhe, por krenaria dhe lumturia janë në qiell”.
Ai foli edhe për momentin kur u detyrua të marrë përgjegjësinë e kryefamiljarit.
“Nuk e kam menduar që në moshë të re do të më binte kjo peshë. Kam qenë 21 vjeç kur babai shkoi në Hagë. Sa herë që e vizitojmë, ai më thotë të kujdesem për mamin e gjyshen”.
Në pjesën tjetër të intervistës, nuk munguan as pyetjet për dashurinë. Kur Grida e pyeti: “Po kur ti bie në dashuri, me kë flet?”, Endriti u përgjigj: “Ende s’kam rënë në dashuri, po kur do e bij, do të flas me nënën.” /Prive By Liberta Spahiu.
