Top Channel ka konfirmuar sot largimin e moderatoreve Enxhi Nasufi dhe Neada Muçaj nga emisioni i mëngjesit, pas një periudhe të gjatë dhe të tensionuar konfliktesh mes tyre. Ky vendim vjen pavarësisht përpjekjeve të dy moderatoreve një ditë më parë për të zbutur zërat që qarkullonin në media.
Sipas burimeve pranë produksionit, tensionet mes dyshes kishin nisur prej muajsh dhe shpesh ishin të dukshme edhe gjatë transmetimit live, ku publiku vinte re distancën dhe mungesën e bashkëpunimit. Situata raportohet të jetë përkeqësuar ndjeshëm, duke shkuar deri në përplasje fizike, një zhvillim ky që e bëri të pashmangshëm ndërhyrjen dhe reagimin e menjëhershëm të drejtuesve të televizionit.
Emisioni i këtij mëngjesi u transmetua me ndryshime të dukshme. Blendi Salaj, i cili vijon të drejtojë programin, njoftoi se formati po hyn në një “fazë të re me bashkëpunëtorë të rinj”, duke shmangur komentet direkte mbi largimin e kolegeve.
Në studio ishte e ftuar ish-banorja e “Big Brother VIP”, Heidi Baci.
Prania e saj u pa nga shumëkush si një sinjal i fortë se Heidi mund të jetë një nga emrat që po shqyrtohet seriozisht nga Top Channel për të zëvendësuar dyshen e larguar dhe për të marrë drejtimin e programit në vazhdim. Salaj shtoi se “Programi vjen i ridimensionuar dhe me një energji ndryshe.”
Për momentin, Top Channel nuk ka bërë ende një njoftim zyrtar se kush do të jetë zëvendësuesi përfundimtar, por burimet bëjnë të ditur se procesi i përzgjedhjes ka nisur. /Prive By Liberta Spahiu
