Ekspertët shëndetësorë kanë lëshuar një paralajmërim urgjent lidhur me një rriqër të infektuar, i cili thuhet se është përhapur në më shumë se 20 shtete të SHBA-së.
Punonjësit e shëndetësisë kanë qenë jashtëzakonisht të zënë kohët e fundit – fillimisht duke paralajmëruar për 15 shpërthime të tërbimit në SHBA, dhe tani shkencëtarët po ngrejnë alarmin për një specie pushtuese të rriqrit, e cila është në gjendje të përhapë infeksione serioze në disa shtete të vendit.
Raste të infeksionit janë konfirmuar së fundmi edhe në Maine, që përfaqëson pikën më verilindore të përhapjes së këtij rreziku në SHBA – gjë që ka rritur shqetësimet e zyrtarëve shëndetësorë.
Fajtori është rriqri aziatik me brirë të gjatë (Asian longhorned tick), i cili është identifikuar nga studiues të Universitetit të Maine, në bashkëpunim me autoritetet e ruajtjes së natyrës të shtetit, që në muajin korrik.
Siç mund ta kuptoni nga emri, ky rriqër ka origjinën nga Azia Lindore, por është përhapur në SHBA në vitet e fundit. Për herë të parë u zbulua në New Jersey në vitin 2017, ku ka përhapur sëmundje si ethe me njolla (spotted fever).
Ndërsa ende nuk dihet me siguri se si ka mbërritur në SHBA, të dhënat shëndetësore publike sugjerojnë se mund të jetë transportuar përmes kafshëve shtëpiake ose bagëtive, raporton The Independent.
Aktualisht, rriqri është përhapur në mbi 20 shtete, shumica prej të cilave ndodhen në pjesën lindore të vendit.
Sipas CDC (Qendra për Kontrollin dhe Parandalimin e Sëmundjeve), vetëm në korrikun e këtij viti janë shënuar më shumë vizita në urgjencë për pickime nga rriqra, sesa në të njëjtën periudhë gjatë tetë viteve të fundit.
Çfarë sëmundjesh mund të transmetojë rriqri aziatik me brirë të gjatë?
1. Sindroma e Trombocitopenisë me Ethe të Rënda (SFTS)
Sëmundje e transmetuar nga rriqra që shkakton:
ethe të larta,
dhimbje barku,
të vjella dhe diarre.
Mund të çojë në:
probleme me veshkat,
hemorragji,
dështim të shumë organeve.
Në disa raste është fatale.
2. Ehrlichiosis
Fillon me simptoma të lehta, si grip, por nëse nuk trajtohet:
60% e rasteve kërkojnë shtrimin në spital Rreth 1 në 100 raste përfundon me fatalitet Si të mbroheni nga rriqrat
Shmangni qëndrimin në zona me bar të lartë, shkurre apo pyje, ose pranë kafshëve.
Përdorni repelentë të regjistruar nga EPA, që përmbajnë:
DEET,
picaridin,
IR3535,
vaj limoni eukalipt (OLE),
PMD,
ose 2-undekanone.
Fillimisht vendosni krem kundër diellit, pastaj repelentin.
Trajtoni rrobat dhe pajisjet me produkte që përmbajnë 0.5% permetrin.
Çfarë thonë ekspertët?
Griffin Dill, drejtor i laboratorit për rriqra në Universitetin e Maine, deklaroi për The Independent:
“Ky zbulim nënvizon rëndësinë kritike të vazhdimit të mbikëqyrjes për rriqrat në Maine. Edhe pse duket si një rast i izoluar, po e ndjekim situatën nga afër në bashkëpunim me partnerët shtetërorë dhe federalë.”
Goudarz Molaei, nga Instituti Eksperimental i Bujqësisë në Connecticut, tha për NBC:
“Më vjen keq ta them, por kjo është si një stuhi që po afrohet. Ndryshimet klimatike do ta zhdukin pothuajse dimrin në rajonin tonë. Dhe ky rriqër, si shumë të tjerë, do të jetë aktiv gjatë gjithë vitit.”
Ndërkohë, Manisha Juthani, komisionere në Departamentin e Shëndetit Publik të Connecticut-it, shtoi:
“Realiteti është që, me ndryshimet që po sjell klima, duhet të jemi më të përgatitur dhe më të vetëdijshëm për infeksionet dhe patogjenët ndaj të cilëve jemi të ekspozuar duke qëndruar jashtë. Këto rreziqe mund të jenë realisht shumë të dëmshme për njerëzit.”
/Prive By Liberta Spahiu
