Një miqësi që dikur konsiderohej e mbyllur, ka marrë një kthesë të papritur gjatë festave të fundvitit.
Megjithëse raportet mes moderatorit Labinot Gashi dhe Dafina Zeqirit, dukeshin të krisura përfundimisht, dhjetori shënoi rikthimin e tyre të madh. Dyshja, që për një kohë të gjatë nuk flisnin për shkak të një hatërmbetjeje, lanë pas të kaluarën për të festuar një përvjetor të rëndësishëm.
Dafina ishte e ftuara e nderit në festën e 25-vjetorit të karrierës së Labit, ku emocionet ishin të papërmbajtshme.
Gjatë fjalimit të tij, Labi u shpreh i privilegjuar për praninë e saj: “Jam me fat, faleminderit që ke qenë pjesë e këtyre 25 viteve të mia. Jam rritur me ty, je rritur edhe ti me Labin. E mira është që sonte festojmë bashkë, aq më tepër që ky vit ka qenë viti më i bukur në botë pasi je bërë nënë.”
Në një moment kulmant, moderatori u tregua mjaft i hapur duke kërkuar ndjesë për çdo keqkuptim të kaluar: “Daf, më fal për gjithçka, ndoshta që të kam lënduar ndonjëherë.”
Nga ana tjetër, këngëtarja e vlerësoi lart rrugëtimin e tij profesional dhe personal. “Jam shumë e lumtur për ty dhe familjen tënde. Të uroj jo 25 po 100 vite karrierë se e meriton”.
“E di edhe vet, që 18 vjet më kanë dashur të mësohem të flas sepse di vetëm të këndoj. Suksese dhe po shpresoj që do të kënaqemi së bashku”, shtoi mes tjerash këngëtarja. /Prive By Liberta Spahiu
