Pas vrasjes tragjike të bashkëshortit të saj, themeluesit të Turning Point USA, Charlie Kirk, bashkëshortja e tij Erika Kirk ka dalë publikisht me një fjalim të fuqishëm, duke njoftuar se do të marrë drejtimin e organizatës si CEO e re.
E vendosur dhe e mbushur me emocion, Erika theksoi se puna dhe vizioni i Charlie-t nuk do të ndalen.
“Unë nuk e marr lehtë këtë përgjegjësi. Charlie dhe unë ishim të bashkuar në qëllim. Pasioni i tij ishte pasioni im, dhe tani misioni i tij është misioni im. Çdo gjë që Turning Point USA ndërtoi përmes vizionit dhe punës së tij, ne do ta bëjmë dhjetëfish më të madh, përmes fuqisë së kujtimit të tij,” tha ajo.
Në fjalimin e saj, Erika premtoi rritje të madhe të kapitujve të organizatës nëpër kampuse amerikane, hapjen e mijëra të rinjve të tjerë, si dhe zgjerimin e TPUSA Faith, ku pritet të përfshihen mijëra pastorë e kongregacione të reja.
Ajo theksoi gjithashtu se aktivitetet publike, debatet dhe ngjarjet do të vazhdojnë, duke vënë theksin tek liria e fjalës:
“Amandamenti i parë i kushtetutës sonë është më njerëzori nga të gjithë… Asnjë atentator nuk do të na ndalojë të mbrojmë këto të drejta.”
Por më prekësja e fjalimit të saj ishte kur foli për personin e dyshuar për vrasjen e bashkëshortit. Me lot në sy, Erika zgjodhi të flasë me falje:
“Burri im donte të shpëtonte të rinj, pikërisht si ai që ia mori jetën. Ai djalë… ai djalë. Në kryq, shpëtimtari ynë tha: ‘Ati, fali, sepse nuk dinë çfarë bëjnë.’ Edhe unë e fal atë. E fal sepse kjo ishte ajo që bëri Krishti dhe kjo është ajo që do të bënte Charlie. Përgjigjja ndaj urrejtjes nuk është urrejtje. Përgjigjja, siç na mëson ungjilli, është dashuria – dashuria për armiqtë dhe dashuria për ata që na përndjekin.”
Me këto fjalë, Erika jo vetëm që shënoi fillimin e një kapitulli të ri për Turning Point USA, por edhe dha një mesazh të fuqishëm të besimit, dashurisë dhe faljes. /Prive By Liberta Spahiu
