DJ dhe producenti brazilian Mochakk, emri i vërtetë Pedro Luis Nunes Maia, ishte një nga emrat kryesorë të edicionit të sivjetëm të Sunny Hill Festival në Prishtinë. Për herë të parë në Kosovë, ai solli një performancë plot energji që ndezi publikun dhe u mbyll mes duartrokitjesh të gjata.
Pas koncertit, Mochakk ndau në rrjetet sociale një kolazh fotosh ku shihej në shoqërinë e Dua Lipës dhe Peggy Gou, të dyja pjesë e festivalit. Në mbishkrimin e fotove, ai u shpreh:
View this post on Instagram
“Sunny Hill Festival, hera e parë në Kosovë, shoqëri e shkëlqyer, kujtime të mrekullueshme, shumë shumë dashuri!”
Në një tjetër moment që po bën xhiron e rrjetit, Mochakk shihet duke bërë me duar shqiponjën, simbolin tonë kombëtar, duke fituar menjëherë zemrat e publikut.
Nga Brazili në skenat më të mëdha
Mochakk është një nga emrat më të përfolur të muzikës elektronike në botë. Vetëm në vitin 2024, ai u rendit në vendin e 61 në listën prestigjioze “Top 100 DJs” të DJ Mag. Karriera e tij mori hov pas një videoje virale në TikTok që i solli mbi një milion pëlqime dhe e çoi në skena të njohura si DC-10 në Ibiza.
Ai është krijues i serisë së eventeve “Mochakk Calling”, që ka ndezur qytete si São Paulo, Miami, Lisbonë dhe Nju Jork. Ka performuar në festivale të mëdha si Coachella, Primavera Sound, Sónar, Time Warp dhe Kappa FuturFestival, ndërsa set-i i tij për Cercle në Plaza de España, Sevilla, është parë nga miliona njerëz në mbarë botën.
Në vitin 2024, Mochakk hapi edhe klubin e tij “OBLIQO” në qytetin e lindjes, Sorocaba. Këngët e tij “Jealous” dhe dy pjesët e “Locomotiva Ibiza 2099” kanë marrë vlerësime të larta dhe mbështetje nga emra të njohur të muzikës elektronike.
Debutimi i tij në Prishtinë ka qenë një sukses i plotë, dhe gjasat janë që Mochakk të rikthehet sërish për të ndarë me ne energjinë e tij unike.
