Një histori që ka tronditur opinionin publik ka ndodhur në Glendale të Kalifornisë, ku një dasmë luksoze u kthye në makth vetëm pak orë pasi çifti kishte kurorëzuar dashurinë e tyre. Në sallën elegante “Renaissance Banquet Hall”, një hajdut i maskuar si mysafir arriti të zhdukte një kuti të tërë me dhurata me vlerë të vlerësuar nga 80 deri në 100 mijë dollarë.
I veshur krejtësisht me të zeza dhe duke u sjellë si pjesë e të ftuarve, ai qëndroi për rreth 90 minuta në dasmë. Madje, sipas dhëndrit, hajduti kishte porositur një pije dhe kishte lënë edhe bakshish tek barmeni, duke mos ngjallur asnjë dyshim. Por momenti kritik erdhi kur ai mori kutinë e dhuratave, ku gjendeshin para të gatshme, çekë dhe kartela dhuratë, dhe u zhduk në mënyrë të organizuar.
Pamjet e kamerave të sigurisë tregojnë skenën e arratisjes së tij: hajduti del nga salla me kutinë në duar dhe i bashkohet një Mercedes-i të zi që e priste në një rrugicë anësore.
Në çastin kur u kuptua vjedhja, muzika u ndal, festa mori fund dhe nusja, Nadeen, shpërtheu në lot e tronditur në dysheme, ndërsa dhëndri George e cilësoi ngjarjen si një shkelje të rëndë të intimitetit të tyre.
Policia e Glendale e ka klasifikuar rastin si vjedhje të rëndë dhe po heton për identitetin e autorit, ndërsa çifti ka shpallur një shpërblim prej 5 mijë dollarësh për këdo që jep informacione që çojnë në kapjen e tij. Në vend që të kërkojë kompensim financiar, çifti ka bërë thirrje vetëm për drejtësi, ndërkohë që kjo ngjarje ka lënë hije të rënda mbi ditën që duhej të ishte më e bukura e jetës së tyre./Prive By Liberta Spahiu
