Bota e muzikës country është në zi pas ndarjes nga jeta të këngëtares së njohur Jeannie Seely, e cila vdiq në moshën 85-vjeçare. Legjenda e Grand Ole Opry u shua pas disa problemeve shëndetësore, përfshirë disa ndërhyrje në shpinë gjatë pranverës dhe humbjen e bashkëshortit të saj, Eugene Ward, në dhjetor të vitit të kaluar.
E lindur në Titusville, Pensilvani, Seely u rrit me ëndrrën për të kënduar në skenën e Opry, duke dëgjuar emisionet radiofonike të këtij institucioni të muzikës country. Ajo e bëri realitet këtë ëndërr në vitin 1967, kur u bë anëtare e Opry, ku performoi më shumë se 5,300 herë gjatë karrierës së saj.
Jeannie Seely është e njohur jo vetëm për zërin e saj të veçantë, por edhe për rolin e saj të rëndësishëm në forcimin e pozitës së grave në skenën country. Ajo ishte gruaja e parë që prezantoi një segment të plotë të Grand Ole Opry dhe ndikoi në ndryshimin e kodit jozyrtar të veshjes për artistet femra.
Karriera e saj shpërtheu me hitin “Don’t Touch Me” në vitin 1966, një këngë që arriti vendin e dytë në klasifikimin Billboard Country dhe i solli një çmim Grammy. Ajo vazhdoi të performonte dhe të regjistronte këngë të suksesshme, përfshirë duetet me Jack Greene, si “Wish I Didn’t Have To Miss You” që u bë hit në vitin 1969.
Përveç skenës së Nashville-it, Jeannie Seely kishte një dashuri të veçantë për qytetin Chattanooga, ku ka performuar disa herë dhe është përkujtuar nga fansat dhe miqtë e saj. Ajo ka qenë një mbështetëse e fëmijëve me aftësi të kufizuara dhe ka marrë pjesë në vizita humanitare gjatë turneve të saj.
Në vitet e fundit, Seely ishte pjesë e kanalit satelitor “Willie’s Roadhouse” në Sirius XM, ku prezantonte emisionin e saj “Sundays with Seely”, ku shpesh ndante dashurinë e saj për muzikën tradicionale country. /Prive By Liberta Spahiu
