Ikona e ekranit amerikan, aktori i famshëm Bruce Willis, po përballet me një përkeqësim të dukshëm të gjendjes së tij shëndetësore si pasojë e demencës frontotemporale, një formë agresive e çrregullimit neurodegjenerativ që prek pjesët e trurit përgjegjëse për sjelljen, komunikimin dhe lëvizjen.
Sipas burimeve të afërta me familjen, Willis nuk është më në gjendje të flasë dhe ka humbur aftësinë për të lexuar, ndërsa përballon gjithashtu edhe vështirësi të konsiderueshme në ecje.
Këto zhvillime vijnë pasi aktori u diagnostikua fillimisht me afazi në vitin 2022 – një gjendje që ndikon në aftësinë për të komunikuar – përpara se diagnoza të përditësohej në demencë frontotemporale në fillim të vitit 2023.
Gjatë viteve 2023 dhe 2024, burime të ndryshme raportuan se ylli i filmave “Die Hard” dhe “Pulp Fiction” ishte bërë kryesisht jofjalor dhe kishte ndaluar së lexuari.
Gjithashtu është raportuar se Willis po përballet me sfida të theksuara motorike, megjithëse familja nuk ka dhënë detaje specifike për gjendjen e tij fizike në muajt e fundit.
Në një deklaratë të publikuar në prill 2025, familja e Bruce Willis – përfshirë bashkëshorten e tij Emma Heming Willis dhe vajzat e tij – konfirmoi se sëmundja e tij vazhdon të jetë progresive, por theksuan se në atë moment gjendja ishte e qëndrueshme.
Ata nënvizuan rëndësinë e unitetit familjar dhe përkushtimin e tyre të palëkundur për të qenë pranë aktorit gjatë kësaj periudhe të vështirë.
“Bruce po përballet me këtë sfidë me dinjitet dhe i rrethuar nga dashuria e familjes së tij. Ne jemi të vendosur ta mbështesim në çdo hap të rrugëtimit të tij,” – u shpreh familja në deklaratë.
Megjithë përkeqësimin e dukshëm të gjendjes së tij, nuk ka pasur ende ndonjë konfirmim zyrtar për ndonjë regres të mëtejshëm shëndetësor përtej asaj që është bërë publike deri më tani.
Bruce Willis, i njohur për rolet e tij ikonike në filmat aksion dhe dramatikë, është një nga figurat më të dashura të kinemasë amerikane. Largimi i tij i detyruar nga aktrimi në vitin 2022 tronditi botën e artit dhe miliona fansa anembanë globit.
/Prive By Liberta Spahiu
View this post on Instagram
