Një nënë nga Maryland është akuzuar për vrasje më shumë se një dekadë pas zhdukjes pa gjurmë të dy fëmijëve të saj të vegjël.
Autoritetet bëjnë me dije se Catherine Hoggle, nga Clarksburg, është personi i fundit që i ka parë të gjallë fëmijët e saj – Sarah, 3 vjeçe, dhe Jacob, 2 vjeç – kur ata u zhdukën papritur në shtator të vitit 2014.
Hoggle, e cila ka pasur probleme të vazhdueshme me shëndetin mendor, fillimisht i kishte thënë partnerit të saj dhe babait të fëmijëve, Troy Turner, se fëmijët ishin vendosur në një qendër të re kujdesi për fëmijë. Por ajo refuzoi t’i tregonte se ku ndodhej saktësisht ajo qendër, pikërisht në ditën kur ai kishte planifikuar t’i merrte fëmijët – rreth 11 vite më parë.
Fillimisht, Hoggle u akuzua për vrasje, por këto akuza u hodhën poshtë, pasi gjykata konstatoi se ajo nuk ishte e aftë mendërisht për të dalë në gjyq. Gjatë viteve të fundit, ajo ka qenë e shtruar në një spital psikiatrik, sipas raportimeve të Associated Press.
Muajin e kaluar, Hoggle, tashmë 38 vjeç, është liruar nga spitali. Por më 31 korrik 2025, një jury i madh e ka akuzuar për dy akuza të vrasjes së shkallës së parë, lidhur me vdekjen e Sarah dhe Jacob.
Në një deklaratë për shtyp nga Zyra e Prokurorit të Shtetit në Qarkun Montgomery thuhej:
“Catherine Ashley Hoggle, 38 vjeçe, nga Clarksburg, është akuzuar nga Grand Jury për dy akuza të vrasjes së shkallës së parë për vdekjen e fëmijëve të saj, Sarah dhe Jacob Hoggle. Aktakuza u kthye të enjten, më 31 korrik 2025.”
Hoggle u arrestua një ditë më vonë, më 1 gusht 2025, në Kent County, Maryland, pasi autoritetet u informuan se ajo nuk ishte më nën kujdes mjekësor. Ajo u transferua për procedurat përkatëse në Montgomery County.
Aktualisht, Hoggle ndodhet në Njësinë Qendrore të Përpunimit të Qarkut Montgomery në Rockville, sipas deklaratës së prokurorisë.
Ndërkohë, babai i Sarah dhe Jacob, Troy Turner, ka kërkuar drejtësi për fëmijët e tij për vite me radhë, përmes faqes në Facebook, FindSarahFindJacob. Pas zhvillimeve të fundit, në faqen e tij është postuar:
“Po ndjekim nga afër zhvillimet më të fundit dhe vazhdojmë të bashkëpunojmë me autoritetet për të kërkuar drejtësi për Sarah dhe Jacob. Ju lutemi të respektoni privatësinë tonë ndërsa përpiqemi të rindërtojmë jetën dhe në të njëjtën kohë vazhdojmë kërkimin për fëmijët tanë. Faleminderit për mirëkuptimin. Do të vazhdojmë të postojmë si gjithmonë dhe do të ndajmë çdo zhvillim për të cilin familja jonë mund të ofrojë perspektivë.”
Avokatët e Hoggle janë duke kërkuar shfuqizimin e akuzave për vrasje, duke pretenduar se arrestimi i fundit është bërë për të njëjtat akuza që ishin hedhur poshtë në vitin 2022.
