Një nga emrat më të njohur të skenës shqiptare, këngëtarja dhe producentja Bleona Qereti, ka hedhur në gjyq në New York aktivisten shqiptaro–amerikane Evi Kokalari, duke kërkuar një dëmshpërblim prej 2 milionë dollarësh.
Padia është depozituar më 15 gusht 2025 në Gjykatën e Lartë të Shtetit New York, Qarku Queens, nga studioja ligjore prestigjioze Waymaker LLC. Në dokumentet zyrtare, Bleona pretendon se prej vitit 2022 është bërë objekt i një fushate të qëllimshme shpifjesh dhe manipulimesh të orkestruara nga Kokalari, të cilat, sipas saj, kanë dëmtuar rëndë reputacionin dhe karrierën ndërkombëtare.
Në padinë e saj, këngëtarja shkruan se Kokalari ka përdorur rrjetet sociale dhe median për të përhapur dezinformime, për të denigruar figurën e saj dhe për të ushtruar presion mbi persona me ndikim në SHBA dhe Shqipëri. Madje, Bleona thekson se është tentuar edhe bojkotimi i eventeve ku ajo ishte e përfshirë.
Këngëtarja, e njohur për stilin e saj të drejtpërdrejtë dhe shpesh provokues, këtë herë ka zgjedhur të flasë me gjuhën e ligjit. Në një deklaratë të shkurtër për mediat, ajo ka thënë: “E vërteta është e dokumentuar, dëshmitarët janë të shumtë dhe është koha që kjo sjellje të marrë zgjidhje ligjore. Publiku ka të drejtë të njohë faktet e plota dhe të mos mashtrohet nga dezinformimi.”
Përplasja mes dy figurave nuk është e re. Të dyja kanë pasur qëndrime të ashpra ndaj njëra–tjetrës në rrjete sociale, duke ndezur shpesh debat publik. Megjithatë, fakti që çështja ka kaluar nga akuza virtuale në sallën e gjyqit në SHBA, e bën këtë histori edhe më të rëndësishme dhe potencialisht me pasoja të gjera.
Nëse Bleona fiton, ky do të jetë një precedent i fortë për figurat publike shqiptare që kërkojnë të mbrojnë emrin dhe imazhin e tyre në arenën ndërkombëtare. Nga ana tjetër, procesi pritet të tërheqë vëmendjen e mediave, jo vetëm për shifrën e majme që kërkohet si dëmshpërblim, por edhe për dinamikat mes artit, politikës dhe imazhit publik.
Një gjë është e sigurt: beteja Bleona–Kokalari sapo ka hyrë në një fazë të re, dhe këtë herë gjithçka do të vendoset përpara gjykatës amerikane.
