Një emër i ri po bën zhurmë në skenën e muzikës shqiptare, dhe ai është ItsLeo.
Reperi vetëm 17-vjeçar, i cili ka lindur në Prishtinë dhe jeton në Londër që në moshën 7-vjeçare, sapo ka shënuar debutimin e tij në skenën muzikore me projektin e parë të titulluar “No Mercy”.
Ky nuk është thjesht një fillim i zakonshëm. Për këtë super projekt, ItsLeo ka bashkuar forcat me emra të njohur të industrisë si Elinel dhe Pllum Beats, duke paralajmëruar një hyrje plot ambicie në treg.
Lidhja e pandashme me rrënjët e tij reflektohet më së miri në videoklipin e këngës. Xhirimet janë realizuar paralelisht në dy qytetet e tij të zemrës, Londër dhe Prishtinë, duke krijuar një urë lidhëse vizuale mes vendit ku jeton dhe vendlindjes.
Përveç talentit premtues në muzikë, ItsLeo po tërheq vëmendjen edhe me stilin dhe paraqitjen e tij, duke u kthyer me shpejtësi në një profil mjaft interesant për publikun e ri.
A po shohim lindjen e një ylli të ri që do të “shpërthejë” në skenën e repit? Këtë mbetet ta presim dhe ta shohim!
/Prive By Liberta Spahiu
