Artisti nga Kosova, Besart Kelmendi, i njohur ndryshe si “Gjesti”, ka shënuar një rrugëtim të veçantë në historinë e reality show-t në trojet shqiptare, duke marrë pjesë në dy edicione të njëpasnjëshme të Big Brother VIP në Kosovë dhe Shqipëri.
Gjesti filloi aventurën e tij më 18 tetor 2024 në edicionin e tretë të “Big Brother VIP Kosova”. Ai qëndroi në shtëpi për 83 ditë, duke u eliminuar pas një televotimi kokë më kokë me Drilon Ramën, i cili më vonë u shpall fituesi i atij edicioni.
Vetëm një ditë pas eliminimit nga BBVK, Gjesti befasoi publikun duke hyrë në “Big Brother VIP Albania 4”, duke e nisur një tjetër rrugëtim në shtëpinë më të famshme në Shqipëri . Ky kalim i shpejtë nga një format në tjetrin ishte i paprecedentë dhe shkaktoi shumë diskutime në rrjetet sociale.
Deri më 18 prill 2025, Gjesti ka kaluar gjithsej 184 ditë në izolim brenda shtëpive të Big Brother në Kosovë dhe Shqipëri, duke vendosur një rekord të ri për qëndrimin më të gjatë në këtë format në trojet shqiptare.
Rrugëtimi i Gjestit në Big Brother VIP Kosova dhe Albania ka qenë i jashtëzakonshëm, duke e bërë atë një nga figurat më të përfolura dhe të pëlqyera të këtij formati. Pjesëmarrja e tij në dy edicione të njëpasnjëshme dhe qëndrimi i gjatë në izolim kanë lënë një gjurmë të thellë në historinë e Big Brother në trojet shqiptare. /Prive By Liberta Spahiu
