Fifi është rikthyer fuqishëm në skenën muzikore me projektin më të ri “Jehonë EP”, një mini-album që përfshin pesë këngë të reja, secila e mbushur me emocione, nostalgji dhe autenticitet artistik.
Me “Jehonë”, këngëtarja sjell sërish atë Fifin e ndjerë, të sinqertë dhe të zhytur në botën e ndjenjave që publiku e ka dashur që në fillimet e saj.
EP-ja përmban pesë perla muzikore: “Aman”, “Do Jem”, “Hapsane”, “Nina Nana” dhe “Të Dua”. Në to, Fifi eksperimenton me tinguj minimalistë, por të pasur në emocione, duke kombinuar baladat klasike me një frymë moderne introspektive. Publiku ka reaguar menjëherë, duke e vlerësuar projektin si një nga më të plotët e saj artistikisht. Komentet në rrjete sociale e përshkruajnë si “një version femëror të Flori Mumajesit”, ndërsa të tjerë shkruajnë se “zëri i saj është magji e pastër që të bën të ndjesh çdo varg”.
Ndër pesë këngët, ajo që po rezulton më e klikuara dhe më e pëlqyera nga publiku është “Aman”, e cila vetëm brenda një dite ka mbledhur gati 100 mijë shikime në YouTube. Një baladë e thellë, e ndërtuar mbi thjeshtësi, ndjenjë dhe një interpretim të brishtë që kujton periudhën më të ndritur të Fifit.
Nga ana tjetër, kënga “Nina Nana” është përshëndetur si një dedikim i ëmbël për të birin, një rrëfim i ngrohtë për dashurinë më të pastër që mund të përjetojë një nënë.
Me “Jehonë EP”, Fifi ka dëshmuar se evolucioni i saj artistik nuk e ka zbehur kurrë shpirtin origjinal që e bëri të dashur për publikun, përkundrazi, e ka kthyer në formën më të mirë të vetes.
/Prive By Liberta Spahiu
