Nëse menduat se Juliana Nura di vetëm të bëjë zhurmë në televizion apo të rrëmbejë vëmendjen me jetën e saj publike, e keni pasur gabim.
Modelja dhe ish-finalistja e Big Brother VIP Kosova po tregon se ka nuhatje serioze për sipërmarrje dhe nuk ka ndërmend të ndalet. Këtë herë, Xhuli ka vendosur të pushtojë tregun ndërkombëtar, duke dërguar shijen e traditës shqiptare direkt e në zemër të Zvicrës. Biznesi i saj i ushqimeve tradicionale, “Pitet e Julit”, tashmë gjendet zyrtarisht në raftet e rrjeteve të njohura të marketeve zvicerane si SPAR dhe AVIA.
Por kjo lëvizje nuk është thjesht një hap i radhës në biznes; është një histori e vërtetë jete që të prek.
Vetë Juliana ka ndarë një rrëfim tejet emocional dhe frymëzues me ndjekësit e saj në rrjetet sociale. Ajo tregoi se si 25 vite më parë, kur ishte vetëm një vajzë e vogël 10-vjeçare me ëndrra të mëdha, shkonte çdo ditë pas shkollës për të punuar pikërisht në marketet SPAR. Aty ku dikur sistemonte produktet e të tjerëve nëpër rafte dhe ëndërronte që një ditë të kishte diçka të sajën, sot, një çerek shekulli më vonë, hyn si partnere biznesi dhe sheh markën e saj të ekspozuar me krenari.
Ky është një moment suksesi i padiskutueshëm për bukuroshen shqiptare, e cila ka nisur edhe një tur masiv promovimi nëpër lokacione të ndryshme, duke përfshirë Baselin, Pratteln e Sissach. Reagimi i publikut ka qenë i menjëhershëm, teksa fansat dhe bashkatdhetarët në diasporë kanë vërshuar për të blerë e për të shijuar pitet e ngrohta me shijen e Kosovës.
Komentet në rrjetet e saj sociale janë plot me vlerësime për cilësinë e produktit dhe shërbimin fantastik. Pas një sërë titujsh në media për debatet e fundit virtuale, Xhuli ka zgjedhur të flasë përmes punës, duke dëshmuar se asgjë nuk mund ta ndalë një grua që di të kthejë vizionin në realitet të prekshëm. /Prive By Liberta Spahiu
