Çifti më i komentuar i sezonit 7 të “Love Island USA”, Chris Seeley dhe Huda Mustafa, po tërheqin vëmendjen e miliona shikuesve me lidhjen e tyre plot pasion, dramë dhe surpriza. Por ajo që nuk e dinë shumë, është se rrugëtimi i Chris-it drejt famës ka një ndalesë shumë të veçantë për publikun shqiptar: Kosovën.
Përpara se të bëhej një emër i njohur në televizionin amerikan, Chris Seeley ka luajtur një sezon të plotë basketbolli me klubin e Rahovecit në Superligën e Kosovës.
Performanca e tij në parketin kosovar është ende e dokumentuar në rrjetet sociale të klubit dhe e ka lënë një gjurmë të fortë në karrierën e tij sportive.
Interesant është fakti se Chris vetë e ka ndarë këtë kapitull në profilin e tij në Instagram, ku ka postuar foto nga periudha në Kosovë, duke përfshirë pamje nga ndeshjet dhe përditshmëria në Rahovec. Sot, ai ndiqet nga më shumë se 220 mijë ndjekës, duke e shndërruar në një nga konkurrentët më me ndikim të këtij sezoni.
Lidhja me Huda Mustafën, influencuese dhe nënë e një vajze, lindi gjatë fazës “Casa Amor” dhe që nga ai moment, çifti është bërë epiqendra e dramës në vilë. Me shpërthime emocionale, debate dhe puthje të zjarrta, ata po ndërtojnë një histori dashurie që po komentohet gjerësisht në rrjete sociale.
Nga parketi i Rahovecit në ekranin e një prej reality-show-ve më të ndjekur në Amerikë, historia e Chris Seeley është një përzierje surprizuese mes sportit, dashurisë dhe famës. Dhe siç duket, kapitulli i Kosovës do të mbetet gjithmonë pjesë e identitetit të tij, edhe në këtë rrugëtim të ri televiziv.
/Prive By Liberta Spahiu
