Një fundjavë aspak e lehtë për perandorin e muzikës turke. Ibrahim Tatlises ka përfunduar sërish në shtratin e spitalit, këtë herë pas një operacioni të papritur. Mëngjesin e së shtunës, më 11 prill, 74-vjeçari iu nënshtrua një ndërhyrjeje të komplikuar në fshikëzën e tëmthit pas një problemi të rëndë dhe urgjent shëndetësor. Fatmirësisht, mjekët e tij kanë dalë me një deklaratë ku konfirmojnë se gjithçka ka shkuar mirë dhe artisti ndodhet nën kujdesin intensiv, jashtë çdo rreziku imediat. Sidoqoftë, kjo ngjarje i ka prishur planet atij për një event me shumë peshë emocionale.
Përmes një postimi prekës në llogarinë e tij në Instagram, Tatlises ndau lajmin me ndjekësit, duke konfirmuar se nuk do të mund të jetë i pranishëm në “Mbrëmjen e Moralit dhe Solidaritetit” që mbahet të hënën mbrëma. Ky organizim i dedikohet mikeshës dhe koleges së tij të ngushtë, këngëtares Cansever. Për ata që nuk e kanë ndjekur me vëmendje gjendjen e saj përgjatë muajve të fundit, Cansever po kalon një sfidë jashtëzakonisht të vështirë. Edhe pse në fillim të vitit u duk se beteja e saj shëndetësore u fitua, ajo u përball me një rikthim të papritur të problemit në mars, duke e detyruar atë t’i nënshtrohej trajtimeve dhe një ndërhyrjeje tepër të specializuar që kërkon mbështetjen e të gjithëve.
“Motra ime Cansever, të dua shumë. Zoti të dhëntë shërim të shpejtë, uroj ta kesh moralin gjithmonë të lartë. Edhe pse nuk mund të jem aty, zemra, lutjet dhe dashuria ime janë me ju,” ka shkruar Ibo në mesazhin e tij publik. Ndonëse jemi mësuar ta shohim Tatlises si të pathyeshëm ndër vite, ky moment tregon anën e tij më njerëzore dhe lidhjen e pandashme me miqtë e vjetër të skenës. Ndërkohë që ai po rikuperohet, komuniteti artistik turk po bëhet njësh për të mbështetur Cansever. /Prive By Liberta Spahiu
