Që nga janari i vitit 2025, jeta e Shqipes, një nëne të re nga Zvicra, u përmbys përmbys.
E diagnostikuar me Leuçemi AML, ajo nisi një betejë të gjatë e të dhimbshme për jetën, duke kaluar nëpër kimioterapi toksike, izolime të gjata, humbje flokësh, dhimbje të vazhdueshme dhe lodhje ekstreme. Por ajo nuk u dorëzua asnjëherë. Çdo ditë luftoi me shpirt për dy fëmijët e saj të vegjël dhe për bashkëshortin e saj, Riadin, që i qëndroi pranë në çdo hap të rrugës.
Në muajt e parë të trajtimit, mjekët ishin dorëzuar. Shqipja u gjend në gjendje kritike, me shpresa pothuajse të shuara. Por ndodhi e pabesueshmja – ajo mbijetoi. Kaloi çdo limit mjekësor dhe u ngrit sërish. Pavarësisht dhimbjeve dhe efekteve anësore, ajo nuk e humbi asnjëherë forcën shpirtërore, duke u bërë frymëzim për këdo që e njihte.
Megjithatë, pak muaj më vonë, lajmi i hidhur u rikthye: kanceri ishte rikthyer. Ishte momenti më i vështirë i familjes. Riadi, bashkëshorti i saj, humbi punën për t’u përkushtuar plotësisht ndaj kujdesit për Shqipen dhe dy fëmijët, një vajzë të vogël dhe një djalë njëvjeçar. Ai mori përsipër rolin e nënës dhe babait, ndërsa në çdo mëngjes shpresonte që mrekullia të ndodhte.
Dhe mrekullia mori formë përmes një ilaçi të ri – Revumor (Revumenib), një terapi e avancuar që ka shpëtuar jetë pacientësh në Shtetet e Bashkuara. Por për familjen, ajo shpresë kishte një çmim të paarritshëm: rreth 500 mijë franga zvicerane, shumë që sigurimet shëndetësore refuzuan ta mbulojnë.
Në atë pikë, e gjithë beteja u kthye në një apel për ndihmë. Përmes një fushate “GoFundMe”, kunata e Shqipes, Rajmonda, nisi të mbledhë fonde për t’i dhënë asaj “shansin e fundit për jetë”. Ajo fushatë e vogël u kthye në një lëvizje të madhe njerëzore që preku mijëra zemra. Brenda disa javësh, u mblodhën 446,344 franga zvicerane, ose plot 88% e shumës totale.
Çdo donacion, çdo shpërndarje dhe çdo lutje sollën një hap më afër shpëtimit. Dhe sot, ajo shpresë është bërë realitet.
Ilaçi i shpëtimit ka mbërritur!
Në një përditësim emocionues, familja ka njoftuar se ilaçi ka mbërritur zyrtarisht në shtëpinë e tyre. Pas muajsh pritjeje, dokumentesh dhe netësh pa gjumë, Mediservice e ka dorëzuar medikamentin, dhe Shqipja ka nisur menjëherë terapinë për të mos humbur asnjë minutë të vlefshme.
Mbrëmë janë kryer ekzaminimet e nevojshme dhe trajtimi me Revumor ka filluar. Ajo po përballet me të përzierat dhe efektet anësore, por po mbahet e fortë, me besimin se kësaj here beteja do të ketë fund të lumtur.
Kunata Rajmonda dhe familja e Shqipes kanë falënderuar nga zemra të gjithë ata që dhuruan, shpërndanë dhe lutën për të. “Pas gjithë atyre netëve pa gjumë, ky moment ndihet si një mrekulli e madhe,” kanë shkruar ata me mirënjohje të thellë.
Sot, Shqipja ka një shans të ri për jetë. Një shans që lindi nga dashuria, solidariteti dhe zemrat e mira të njerëzve nga e gjithë bota.
Për Shqipen. Për fëmijët e saj. Për dashurinë e një nëne që nuk u dorëzua kurrë. /Prive By Liberta Spahiu
