Një studim i publikuar së fundmi ka zbuluar se një trajtim për humbje peshe është pesë herë më efektiv se ilaçet GLP-1 si Ozempic, Mounjaro dhe Wegovy, në një kohë kur përdorimi i tyre po rritet ndjeshëm.
Ozempic, një injeksion për diabetin e tipit 2 që ndihmon në menaxhimin e sheqerit në gjak, është bërë i njohur për humbje peshe, megjithëse nuk është miratuar për këtë qëllim – ndryshe nga Mounjaro dhe Wegovy.
Studiuesit këshillojnë që njerëzit të kenë pritshmëri më realiste ndaj injeksioneve për humbje peshe dhe të konsiderojnë alternativa më efektive.
Studimi tregon se gastrektomia me mëngë dhe bypass-i gastrik janë pesë herë më efektivë se semaglutida (Ozempic/Wegovy) dhe tirzepatida (Mounjaro).
Sipas ekspertëve nga NYU Langone Health dhe NYC Health + Hospitals, pacientët që iu nënshtruan operacionit humbën mesatarisht 26 kg në dy vjet, krahasuar me vetëm 5.5 kg për ata që përdorën GLP-1 për të paktën gjashtë muaj.
Edhe pse përdoruesit e GLP-1 kishin më pak kohë për të humbur peshë, studiuesit theksojnë se shumë pacientë e kanë të vështirë të qëndrojnë në trajtim afatgjatë.
Dr. Avery Brown, autori kryesor i studimit, thotë se 70% e përdoruesve e braktisin trajtimin brenda një viti.
Pas një viti me GLP-1, pacientët kishin humbur vetëm 7% të peshës trupore, krahasuar me 24% për ata që bënë operacion.
Dr. Brown shton: “Provat klinike tregojnë humbje 15–21% për GLP-1, por në praktikë reale rezultatet janë dukshëm më të ulëta, edhe me receta të qëndrueshme.”
Ai sugjeron që pacientët duhet të rregullojnë pritshmëritë, të ndjekin më me përpikëri trajtimin ose të konsiderojnë kirurgjinë metabolike dhe bariatrike.
Natyrisht, çdo operacion ka rreziqet e veta – si infeksione, mpiksje gjaku, bllokime zorrësh dhe hernia, sipas Mayo Clinic.
Operacioni është një zgjidhje e përhershme, ndërsa trajtimi me ilaçe mund të ndërpritet në çdo moment.
Megjithatë, edhe pas operacionit kërkohet ndjekje strikte e dietës dhe aktivitetit fizik për të ruajtur rezultatet.
Kirurgu bariatrik Karan Chhabra nga NYU Grossman School of Medicine shtoi:
“Në të ardhmen, do të përpiqemi të kuptojmë si të përmirësojmë rezultatet e GLP-1, cilët pacientë përfitojnë më shumë nga kirurgjia sesa nga ilaçet, dhe si ndikon kostoja personale në suksesin e trajtimit.” /Prive By Liberta Spahiu
