Kanë kaluar saktësisht 12 muaj që kur opinioni publik shqiptar pësoi tronditjen më të madhe lidhur me ikonën e muzikës, Parashqevi Simaku.
Gjithçka nisi kur ajo u shfaq në një intervistë për një televizion amerikan, jo si ylli që njohim, por si një grua e pastrehë që kërkonte ndihmë. Në atë kronikë të huaj, ajo prezantohej me emrin “Nolfe” dhe fliste për vështirësitë e saj të mbijetesës në rrugë, pamje që thyen zemrat e publikut shqiptar sapo u transmetuan.
Pikërisht në këtë përvjetor të asaj ngjarjeje të dhimbshme, miku i saj, Elton Ilirjani, ka vendosur të shënojë kthesën përfundimtare me një darkë speciale.
Ndonëse viti 2025 solli përmirësime – përfshirë ritakimin pas shumë vitesh me djalin, Lukën, dhe strehimin në Manhattan falë qirasë së paguar nga një biznesmen kosovar – fundviti solli sërish frikë. Kontrata e shtëpisë përfundon në fund të janarit dhe rreziku që Parashqevi të rikthehej në rrugë ishte real.
Por, Ilirjani, pas alarmit javë më parë, ka prerë çdo pasiguri mbrëmjen e kaluar. Ai njofton se nuk do të ketë më fushata mbledhje fondesh apo pritje nga të tjerët.
“Të kam shumë xhan! Ti nuk do jesh kurrë në rrugë apo në problem! Sepse zotohem që çdo gjë do financohet nga unë personalisht! Qera shtëpie, jetesa jote e përditshme dhe çdo gjë që do ti! Nuk kemi nevojë më për asnjë gjë!” – shkruan ai.
Me këtë gjest, Ilirjani duke falënderuar shqiptarët për donacionet në GoFundMe mbyll përfundimisht kapitullin e trishtë të nisur nga ajo intervistë në Amerikë, duke garantuar se ikona shqiptare nuk do të ketë më kurrë nevojë të prezantohet si e pastrehë. /Prive By Liberta Spahiu
