Tensionet në shtëpinë e Big Brother VIP Kosova kanë arritur majat gjatë ditës së sotme, duke kulmuar në një incident të rëndë mes banorëve. Një debat verbal mes Labinot Rexhës dhe Klodit ka eskaluar në veprime fizike, ku ky i fundit raportohet t’i ketë hedhur pije energjike në fytyrë këngëtarit ndërsa ndodhej në shtrat.
Ngjarja ka shkaktuar reagimin e menjëhershëm të familjes dhe menaxhmentit të Labinotit, të cilët kanë publikuar një “Deklaratë Zyrtare” në llogarinë e tij në Instagram, duke dënuar ashpër veprimin.
Sipas reagimit zyrtar, incidenti cilësohet si një cenim i rëndë i dinjitetit dhe sigurisë fizike. Në deklaratë thuhet shprehimisht:
“Ndaj Labit është ushtruar presion psikologjik, si dhe është kryer një veprim i papranueshëm duke i hedhur pije energjike në fytyrë, kryesisht në zonën e syve.”
Familja thekson se ky veprim tejkalon çdo kufi të lojës apo debatit verbal, duke rrezikuar shëndetin e banorit, sytë.
Familja dhe menaxhmenti i Labinotit kanë shprehur shqetësimin e thellë për faktin se personi përgjegjës (Klodi) vazhdon të qëndrojë në shtëpi “pa asnjë masë të dukshme”. Ata paralajmërojnë se tolerimi i sjelljeve të tilla krijon një precedent të rrezikshëm brenda formatit.
Në mbyllje të deklaratës, ata i bëjnë thirrje produksionit dhe “Vëllait të Madh” që të trajtojnë rastin me seriozitet maksimal: “Kërkojmë… të merren masat disiplinore përkatëse, në përputhje me rregulloren e Big Brother VIP Kosova.”
Publiku tashmë është në pritje të “Prime-it” ose një njoftimi nga produksioni për të parë nëse do të ketë përjashtim apo dënim për këtë gjest. /Prive By Liberta Spahiu
