Një mungesë e pazakontë në transmetimin e mbrëmshëm të emisionit të mirënjohur politik “Opinion” në TV Klan, ka shkaktuar një valë spekulimesh dhe teorish konspirative në hapësirën mediatike dhe rrjetet sociale shqiptare.
Pasi emisioni i drejtuar nga Blendi Fevziu nuk u shfaq në orarin e tij të zakonshëm, pa asnjë njoftim paraprak apo sqarim, menjëherë u aludua se anulimi mund të ishte i qëllimshëm dhe i lidhur me përmbajtje të ndjeshme.
Për t’i dhënë fund thashethemeve, vetë Blendi Fevziu reagoi përmes një videoje, ku sqaroi me detaje arsyen e vërtetë të mungesës dhe hodhi poshtë çdo aludim për censurë.
Në sqarimin e tij, Fevziu theksoi se lajmet që qarkullonin, sipas të cilave emisioni ishte regjistruar por nuk ishte lejuar të transmetohej sepse përmbante “video sekrete të Ballukut”, janë krejtësisht të pavërteta.
“Emisioni Opinion nuk është transmetuar mbrëmë si rrallë herë. Në fakt ka qenë gabim i TV Klan që duhet të kishte sqaruar që në mëngjes që Opinion nuk do transmetohej për t’i hapur rrugë spektaklit ‘Topi i Artë’. Klani nuk e ka bërë këtë.”
Prezantuesi sqaroi se nuk ishte bërë fjalë për censurë apo ndalim, por për një problem logjistik dhe komunikimi. Ai theksoi se natyra e emisionit është kryesisht live, duke mohuar zërat se ishte regjistruar:
“Unë nuk pranova të hyj më vonë. Emisioni nuk është bërë gati sepse janë 99 përqind live.”
Për të vërtetuar angazhimin e tij për transmetimin e planifikuar, Fevziu shtoi: “Unë kam anuluar udhëtimin që kisha për të bërë ekzaktësisht emisionin që kisha në plan ta bëj sot.”
Blendi Fevziu e përfundoi reagimin e tij duke e etiketuar situatën si një “banalitet i kohës, banalitet shqiptar” dhe duke ritheksuar se përgjegjësia i takon kanalit për mosnjoftimin në kohë të publikut: “Gabim i Klanit që duhej ta kishin njoftuar që emisioni nuk do transmetohej.” /Prive By Liberta Spahiu
