Një ilaç i ri për humbje peshe, i zhvilluar nga shkencëtarët në Universitetin Tufts, është përshkruar si “Ozempic-u i radhës”, por dy herë më efektiv dhe me më pak efekte anësore krahasuar me ilaçin popullor që tashmë përdoret në treg.
Ozempic është një injeksion i miratuar fillimisht për personat me diabet të tipit 2, për të ndihmuar në menaxhimin e nivelit të sheqerit në gjak, por shumë njerëz e përdorin atë edhe për humbje peshe. I miratuar nga FDA në vitin 2017, ilaçi jepet një herë në javë, me doza që nisin nga 0.25 mg dhe shkojnë deri në 2 mg.
Megjithatë, përdorimi i tij shpesh shoqërohet me efekte anësore si: nauze, humbje të masës muskulore, shtim të peshës pas ndërprerjes dhe fryrje të tepërt.
Medikamenti i ri, i cili është ende në fazë eksperimentale dhe nuk është testuar tek njerëzit, premton të sjellë humbje peshe deri në 30%, duke shënjestruar njëkohësisht katër hormone të ndryshme: GLP-1, GIP, glukagonin dhe peptidin YY.
Ky kombinim synon të balancojë kontrollin e oreksit, rregullimin e sheqerit në gjak dhe përdorimin e energjisë, duke ulur në të njëjtën kohë rrezikun për nauze apo probleme me nivelin e sheqerit.
“Ne ndërtuam një peptid eksperimental që funksionon si katër hormone në të njëjtën kohë. Në vend që të shtypim vetëm një buton shumë fort, ne po i rregullojmë njëkohësisht katër ‘dimmer switch’-a për të menaxhuar oreksin, sheqerin në gjak dhe energjinë,” shpjegoi autori kryesor i studimit, Tristan Dinsmore, PhD, për Fox News Digital.
Sipas studimit të publikuar në Journal of the American Chemical Society, rëndësi e veçantë i është dhënë hormonit GIP, pasi ai mund të zvogëlojë ndjeshëm nauzen që shkaktohet shpesh nga GLP-1 dhe PYY në doza të larta.
Edhe pse premton shumë, ky ilaç ndodhet ende në fazë paraklinike dhe mund të kalojë shumë kohë derisa të dalë në treg — nëse do të miratohet ndonjëherë. /Prive By Liberta Spahiu
