Ditët e fundit, rrjetet sociale u pushtuan nga një sekuencë e emisionit “Politiko” të së enjtes së kaluar, ku moderatori Kushtrim Sadiku u shfaq me vështirësi të dukshme në artikulim. Pamjet bënë xhiron e internetit me një shpejtësi marramendëse, ndërsa komentuesit e morën si të mirëqenë faktin se gazetari kishte dalë në transmetim të drejtpërdrejtë nën ndikimin e alkoolit. Situata u bë edhe më e ndjeshme dhe ndezi gjakrat në publik për shkak se emisioni në fjalë i dedikohej një teme me peshë të madhe historike dhe emocionale, siç është Beteja e Koshares.
Pas heshtjes disaditore dhe përballjes me një lumë kritikash, Kushtrim Sadiku ka reaguar zyrtarisht pak minuta më parë përmes një statusi në llogarinë e tij në Facebook. Duke kërkuar ndjesë publike për situatën e krijuar, ai ka hedhur poshtë në mënyrë kategorike zërat se ishte i dehur, duke sqaruar se gjendja e tij erdhi si pasojë e problemeve shëndetësore. Sadiku zbuloi se një terapi që po ndjek për një sëmundje të lukthit, e kombinuar me një trajtim të implanteve dentare, i kanë shkaktuar dhimbje, lodhje dhe vështirësi në komunikim. “Gjithçka tjetër që po përflitet nëpër rrjete sociale nuk është e vërtetë,” ka theksuar ai në reagimin e tij.
Gazetari pranoi se vendimi për të mos e anuluar emisionin pavarësisht gjendjes së rënduar fizike ishte një vlerësim i gabuar nga ana e tij, megjithëse ishte nisur nga dëshira për të mos munguar në ekran siç ka bërë prej 17 vitesh pa shkëputje. Për të shuar çdo keqkuptim rreth tematikës së emisionit, ai nënvizoi respektin e tij maksimal për Kosharen, si qytetar dhe si gazetar. Sadiku nuk i kurseu as kritikat e ashpra për ata që e kryqëzuan, duke u shprehur se nuk e mirëkupton “stuhinë e llumit” të drejtuar nga grupe ekstremistësh, “snajperistësh të rrjeteve sociale” dhe dashakeqës me motivacione politike. Pavarësisht furtunës mediatike, ai ka konfirmuar se do të vazhdojë të jetë në krye të detyrës duke u rikthyer në ekran që sonte. /Prive By Liberta Spahiu
