Pas më shumë se një dekade në krye të një prej shtëpive më të famshme të modës franceze, Olivier Rousteing ka njoftuar zyrtarisht largimin nga Balmain, duke i dhënë fund një epoke që zgjati plot 16 vite. Lajmin e ka konfirmuar vetë përmes një postimi emocional në Instagram, ku e përshkroi këtë periudhë si një “histori dashurie dhe jete”.
“Erdha në Balmain në moshën 24-vjeçare me sytë hapur dhe vendosmërinë për të vazhduar gjithmonë përpara. Sot largohem me sytë po aq hapur – drejt të ardhmes dhe aventurave të bukura që më presin”, shkruan Rousteing në mesazhin e tij falënderues, duke i shprehur mirënjohje ekipit, familjes së zgjedhur dhe grupit që i besuan që në fillim.
Nën drejtimin e tij, Balmain u rilind si simbol i fuqisë, sensualitetit dhe kulturës pop moderne. Olivier krijoi epokën e “Balmain Army” dhe bashkëpunoi me disa nga emrat më të mëdhenj të muzikës dhe modës, përfshirë Beyoncé, Rihanna dhe Kim Kardashian. Me të, marka u bë sinonim i luksit bashkëkohor dhe ndikimit digjital.
Largimi i tij shënon mbylljen e një kapitulli të artë për shtëpinë franceze dhe fillimin e një ere të re për vetë Rousteing, i cili premton se udhëtimi i tij kreativ sapo ka nisur.
/Prive By Liberta Spahiu
