Këngëtarja e njohur Jessie J ka njoftuar publikimin e albumit të saj të gjashtë në studio, “Don’t Tease Me with a Good Time”, i cili do të dalë më 28 nëntor 2025.
Në një deklaratë për shtyp të ndarë më 28 gusht dhe në postime në Instagram, ajo tregoi se albumi do të përfshijë këngët “No Secret”, “Believe in Magic”, “And the Award Goes To” dhe “Living My Best Life”.
Albumi mund të porositet paraprakisht në formatin vinyl dhe CD, dhe ajo la të kuptohet se do të ketë materiale të firmosura dhe surpriza të tjera për fansat.
Ky njoftim vjen pasi Jessie J u detyrua të shtyjë datat e turneut akustik në Mbretërinë e Bashkuar dhe Evropë për në prill 2026, ndërsa koncertet në SHBA u anuluan, pas diagnozës me kancer gjiri dhe nevojës për një operacion të dytë deri në fund të vitit.
Ajo e bëri publike diagnozën në qershor, duke treguar se ishte diagnostikuar përpara se të publikonte këngën “No Secret” në prill. Në gusht, Jessie ndau me ndjekësit e saj se ishte 7 javë pas operacionit, duke theksuar:
“Jam ende në proces rikuperimi, por e dua jetën dhe muzikën, dhe dua të jetoj në moment.”
Më 6 shtator, ajo u rikthye në skenë në BBC Radio 2 In the Park, ku performanca kishte një domethënie të veçantë — ishte hera e parë që djali i saj 2-vjeçar, Sky Safir, e pa të këndonte live.
“Jam aq mirënjohëse që jam këtu,” tha ajo para publikut. “Pas gjithë këtyre viteve, të dëgjoj zërat tuaj duke kënduar me mua është një ndjesi që nuk përshkruhet.” /Prive By Liberta Spahiu
